بھٹکل اورکاروار سمندر سے سیٹلائٹ فون استعمال کرنے کی خبر۔ ضلع ایس پی نے کہا: مجھے اس کا علم نہیں ہے
کاروار 2/اکتوبر (ایس او نیوز) اسرو کے حوالے سے ایک خبر گردش کررہی ہے کہ بھٹکل اور کاروار کے سمندری علاقے سے سیٹلائٹ فون کا استعمال ہورہا ہے۔ اس پر اپنا ردعمل ظاہر کرتے ہوئے ضلع شمالی کینرا کے ایس پی شیوپرکاش دیوراج نے واضح کردیا ہے کہ ہمارے علاقے میں اس طرح کے فون کالس کیے جانے کے بارے میں مجھے کوئی علم نہیں ہے۔
دو تین دنوں سے یہ خبر عام ہوئی ہے کہ 9ستمبر کو کاروار سمندر میں 154کلو میٹر کے فاصلے سے سیٹلائٹ کال کی گئی ہے۔ اس کے علاوہ 7ستمبر کو شام پانچ بجے کے قریب کاروار ساحل سے سیٹلائٹ فون استعمال کیاگیا ہے۔اس سرگرمی کی نشاندہی اسرو نے کی ہے اور اس کی اطلاع مرکزی وزارت داخلہ کو بھیجی ہے۔ اس تعلق سے دریافت کرنے پر ضلع ایس پی نے کہا کہ عام طور پر مختلف ممالک سے آنے والے جہازوں میں سیٹلائٹ فون استعمال کیے جاتے ہیں۔اور اس تعلق سے خبریں موصول ہوتی رہتی ہیں۔ لیکن 6ستمبر اور 9ستمبر کو سیٹلائٹ فون استعمال کیے جانے کے تعلق سے مجھے کوئی اطلاع نہیں ملی ہے۔
ایس پی نے بتایا کہ ساحل سے سمندر میں 12کلو میٹر کی دوری تک ضلع پولیس کا دائرہ اختیار ہوتا ہے۔ 12سے24کلو میٹر تک کوسٹل سیکیوریٹی پولیس اور 24کلو میٹر سے آگے3000کلو میٹر تک نیوی کا کنٹرول ہوتا ہے۔اس لئے سیٹلائٹ کال کیے جانے کا فاصلہ جو بتایا جارہا ہے وہ پولیس کے حدود میں نہیں آتا ہے۔
بتایاجاتا ہے کہ اسرو کی طرف سے سیٹلائٹ فون استعمال کرنے کی خبر وزارت داخلہ کو روانہ کیے جانے کے بعد وزارت داخلہ نے دسہرہ کے موقع پر دہشت گردانہ کارروائی کے امکانات ظاہر کرتے ہوئے ریاست میں چوکسی برتنے کی ہدایات جاری کی ہے۔لیکن نیوی کی طرف سے بھی اس تعلق سے کوئی بات سامنے نہیں آرہی ہے۔البتہ بھٹکل اور کاروار سمندری علاقے سے سیٹلائٹ فون کالس کیے جانے کی خبر سے عوام کے اندر فطری طور پر شکوک اور تشویش کا ماحول پید ا ہوگیا ہے۔