ناگپور،08/اکتوبر(ایس او نیوز/آئی این ایس انڈیا) آر ایس ایس کے سربراہ موہن بھاگوت نے کہاہے کہ لنچنگ مغربی طریقہ ہے اور ہندوستان کو بدنام کرنے کے لیے اس کا استعمال قطعی نہیں کیا جانا چاہیے۔وجے دشمی کے موقع پربھاگوت نے کہاکہ لنچنگ لفظ کی شروعات ہندوستانی اقدار سے نہیں ہوئی،ایسے لفظ کو ہندوستانیوں پر نہ تھونپیں۔لنچنگ مغربی طریقہ ہے اور ملک کو بدنام کرنے کے لیے ہندوستان کے تناظر میں اس کا استعمال نہیں کیا جانا چاہیے۔سنگھ اپنے اس نظریہ پر قائم ہیں کہ ’ہندوستان ایک ہندو راشٹر‘ہے۔ انہوں نے کہاکہ سنگھ کی اپنے ملک کی شناخت کے بارے میں، ہم سب کی اجتماعی شناخت کے بارے میں، ہمارے ملک کے مزاج کی شناخت کے بارے میں واضح نقطہ نظر کا اعلان ہے، وہ اپنے فیصلہ پر قائم ہے کہ ہندوستان ہندوراشٹر ہے۔ انہوں نے کہا کہ ملک کی شان اور امن کے لیے کام کرنے والے تمام بھارتی ہندو ہیں۔بھاگوت نے جموں کشمیر کو خصوصی درجہ دینے والے آرٹیکل 370 کے زیادہ تر دفعات کو ہٹانے کے لیے وزیر اعظم نریندر مودی اور وزیر داخلہ امت شاہ کی تعریف بھی۔ گزشتہ چند سالوں میں بھارت کی سوچ کی سمت میں ایک تبدیلی آئی ہے، جسے نہ چاہنے والے شخص دنیا میں بھی ہیں اور بھارت میں بھی اور ذاتی مفادات کے لیے یہ طاقتیں ہندوستان کو مضبوط اور طاقتورنہیں ہونے دینا چاہتیں۔ ملک کی سلامتی پر سنگھ سربراہ نے کہاکہ خوش قسمتی سے ہمارے ملک کے سیکورٹی طاقت کی حیثیت، ہماری فوج کی تیاری، ہمارے حکومت کی سیکورٹی پالیسی اور ہماری بین الاقوامی سیاست میں مؤثر طریقے کی حیثیت اس قسم کی بنی ہے کہ اس معاملے میں ہم لوگ چوکنا اور پر اعتماد ہیں۔ سنگھ کے سربراہ نے ملک کی ساحلی حدود کی حفاظت پر زیادہ زور دیئے جانے کی ضرورت بھی اجاگر کی۔انہوں نے کہاکہ ہماری حدود اور پانی سرحدوں پر سیکورٹی نگرانی پہلے سے اچھی ہے۔سماج کے مختلف طبقوں کو آپس میں خیر سگالی اور تعاون بڑھانے کے لیے کوشاں ہونا چاہیے۔