سگایا پورم وارڈ پر کانگریس کا غلبہ برقرار، کاویری پورہ وارڈ میں بی جے پی کو صرف 78ووٹوں سے جیت
بنگلورو، یکم جون(ایس او نیوز)شہر کے سگایاپورم اور کاویری پورہ وارڈوں کے لئے کروائے گئے ضمنی انتخابات میں کانگریس اور بی جے پی نے علی الترتیب کامیابی حاصل کرلی۔ سگایا پورم وارڈ سے منتخب آزاد کارپوریٹر ایلو ملائی کی موت کے سبب خالی ہونے والی سیٹ پر کانگریس پارٹی نے ان کی بہن پلانی امل کو میدان میں اتارا۔ جبکہ کاویری پورہ وارڈ سے منتخب جے ڈی ایس کارپوریٹر اور ڈپٹی میئر رمیلا اوما شنکر کی جگہ کانگریس جے ڈی ایس مشترکہ امیدوار کے طور پر سشیلا کو میدان میں اتارا گیا۔ سگایاپورم نے اپنی بالادستی برقرار رکھی، لیکن کاویری پورم میں جے ڈی ایس کو کامیابی نہیں ملی اور وہاں سے بی جے پی کی سی پلوی چنپا نے اپنی حریف کو شکست دی۔ سگایا پورم وارڈ میں پلانی امل نے 7182 ووٹ حاصل کئے، جبکہ ان کی حریف بی جے پی کی جیرین کو 639ووٹ ملے، جبکہ آزاد امیدوار ماری متو نے 4143 ووٹ حاصل کرکے دوسرا مقام حاصل کیا۔ کاویری پورم میں ہوئے سخت مقابلے میں بی جے پی کی پلوی نے جے ڈی ایس کی سشیلا سریش کو صرف 78 ووٹوں سے شکست دی۔ جبکہ آزاد امیدوار کملا کو 275ووٹ ملے۔