نئی دہلی،14نومبر(آئی این ایس انڈیا) کانگریس کے سینئر لیڈر ششی تھرور نے سبری مالا مندر اور کچھ دیگر مسائل پر نئے سرے سے غور کے لئے آئینی بنچ کے پاس بھیجے جانے کے سپریم کورٹ کے فیصلے کا خیر مقدم کرتے ہوئے کہا کہ یہ مسئلہ تمام مذاہب کی رسوم پر اثر ڈالنے والے ہیں۔تریونت پورم سے ممبر پارلیمنٹ تھرور نے ٹویٹ کر کہاکہ میں سبری مالا مندر کے مسئلے کو بڑی بنچ کے پاس بھیجے جانے کے سپریم کورٹ کے فیصلے کا خیر مقدم کرتا ہوں،یہ مسئلہ تمام مذاہب کے عقیدے پر اثر ڈالنے والے ہیں۔ دراصل سپریم کورٹ نے سبری مالا مندر، مساجد میں خواتین کے داخلے اور داوودی بوہرا سماج میں عورتوں کے ختنہ سمیت مختلف مذہبی مسائل جمعرات کو نئے سرے سے غور کے لیے سات رکنی آئینی بنچ کو سونپ دیئے۔چیف جسٹس رنجن گوگوئی کی صدارت والی پانچ رکنی آئینی بنچ ان مذہبی مسائل کو نئے سرے سے غور کے لیے سات رکنی بنچ کو سونپے جانے پر متفق تھی،حالانکہ، چیف جسٹس رنجن گوگوئی، جسٹس اے ایم کھانولکر اور جسٹس اند ملہوترا نے اکثریت کے فیصلے میں سبری مالا مندر میں تمام عمر کی خواتین کو رسائی کی اجازت دینے سے متعلق اپنے فیصلے پر نظر ثانی کی درخواستوں کو زیر التواء رکھنے کا فیصلہ کیا۔