میرا بیٹا انتخابی دوڑ میں نہیں ہے۔ دیشپانڈے کی وضاحت۔ خود کی اُمیدواری پراختیار کی خاموش
ہلیال13؍مارچ (ایس او نیوز) ضلع انچارج اور ریوینیو منسٹر آر وی دیشپانڈے نے ایک پریس کانفرنس کے دوران واضح کیا ہے کہ ضلع شمالی کینرا میں کانگریسی ٹکٹ پر انتخاب لڑنے کے لئے امیدوارکی تلاش تو ہورہی ہے، لیکن ان کے اپنے فرزند پرشانت دیشپانڈے اس دوڑ میں نہیں ہیں۔اس کے ساتھ ہی انہوں نے اپنے خودکے امیدوار بننے کے سلسلے میں خاموشی اختیار کررکھی ہے۔
یاد رہے کہ سال 2014 میں جو پارلیمانی انتخاب منعقد ہواتھا اس میں پرشانت دیشپانڈے نے کانگریسی امیدوار کے طورپر مقابلہ کیاتھا مگربی جے پی کے اننت کمار ہیگڈے کے ہاتھوں انہیں شکست کا منھ دیکھنا پڑا تھا۔
اس بار کے پارلیمانی انتخابات میں ریاست بھر میں کانگریس اور جنتادل کے مشترکہ امیدوار میدان میں اترنے والے ہیں ۔ ضلع شمالی کینرا میں بھی مشترکہ امیدوار ہونا یقینی ہے۔لیکن یہ امیدوار کانگریس سے ہوگا یا جے ڈی ایس سے ہوگا ، اس تعلق سے ابھی قطعی بات سامنے نہیں آئی ہے۔یہ حلقہ کانگریس کو ملنے کی صورت میں متوقع امیدواروں کی جو فہرست ہے اس میں آر وی دیشپانڈے، بی کے ہری پرساد، بی کے نائک، پرشانت دیشپانڈے، نویدیت آلواوغیرہ کے نام سننے میں آرہے ہیں۔جبکہ یہ سیٹ جنتا دل ایس کو ملنے کی صورت میں امیدوار کے طور پر آنند اسنوٹیکر اور ششی بھوشن ہیگڈے کے علاوہ ڈاکٹر ناگیش نائک اوررویندرا نائک کے نام سامنے آرہے ہیں۔اب دیکھنا یہ ہے کہ کانگریس اور جنتادل کے درمیان سیٹوں کی تقسیم کو لے کر جو الجھنیں ہیں وہ کب ختم ہوتی ہیں اور ضلع شمالی کینرا کا سیاسی اونٹ کس کرو ٹ بیٹھتا ہے۔