میسورو،25؍فروری (ایس او نیوز) بروز چہارشنبہ میسور وسٹی کارپوریشن کے کونسل ہال میں منعقدہ میسورو کے مئیر اور ڈپٹی مئیر کے انتخابات میں کانگریس اور جنتا دل(ا یس) نے ایک دوسرے کی حمایت کی، جس کی وجہ سے جے ڈی ایس کی وارڈ نمبر36کی کارپوریٹر رکمنی مادے گوڈا مئیر اور کانگریس کے وارڈ نمبر 10کے کارپوریٹر انور بیگ عرف آفتاب ڈپٹی مئیر منتخب کرلئے گئے۔

مئیر اور ڈپٹی مئیر کی ریزرویشن کی فہرست کے تحت اس مرتبہ میسور کے مئیر کا عہدہ جنرل طبقے کی خاتون کے لئے ریزروتھا، جبکہ ڈپٹی مئیر کا عہدہ جنرل طبقے کے لئے محفوظ رکھا گیا تھا۔رکمنی مادے گوڑا کو کل 43 ووٹ ملے جبکہ انور بیگ کو 44 ووٹ ملے۔ بھارتیہ جنتا پارٹی کی مئیر کے عہدے کی امیدوار سنندا پھلانیترا کو صرف26ووٹ ملے اور ڈپٹی مئیر کے امیدوار ساتویک کو بھی 26ووٹ ملے اور دونوں کو شکست کا منہ دیکھنا پڑا۔کانگریس پارٹی کی جانب سے شانتا کماری نے میئر کے عہدے کے لئے نامزدگی کے کاغذات داخل کئے تھے لیکن خود کانگریس کے کارپوریٹرس بھی انہیں ووٹ نہیں ڈالا، اس طرح شانتا کماری کو 0 ووٹ ملے۔

میسور وسٹی کارپوریشن کی 65رکنی کونسل میں بی جے پی (22) کانگریس (19) اور جنتا دل (ا یس) (18) بی ایس پی کا ایک اور 5آزاد کارپوریٹرس ہیں۔ رکن پارلیمان پرتاب سمہا، اراکین اسمبلی ایس اے رام داس اور ایل ناگیندرا نے آج کے انتخاب میں حصہ لیا اور بی جے پی کے امیدوار کے حق میں ووٹ دیا۔ جبکہ یم یل سی کے ٹی سری کنٹے گوڑا اور مری تبے گوڑا نے رکمنی کے حق میں ووٹ دیا۔ کانگریس کے رکن اسمبلی تنویر سیٹھ اورا یم ا یل سی دھرم سینا نے اپنا ووٹ ڈالا۔ رکن اسمبلی جی ٹی دیوے گوڑا اورا یم ایل سی سندیش ناگراج دونوں غیر حاضر رہے۔ رات بھر کی میٹنگوں کے باوجودتینوں پارٹیاں کوئی ٹھوس فیصلہ نہیں کرسکیں، اس لئے اپنے اپنے امیدواروں کو میدان میں اتارنے کا فیصلہ کیا۔