پتور 23/اکتوبر (ایس او نیوز)امسال مارچ کے مہینے میں نری موگرو کے قریب پارک کی گئی ایک لاری کے کیبن سے 1.5لاکھ روپے چوری کیے جانے واردات پیش آئی تھی جس کے تعلق سے پتور پولیس اسٹیشن میں کیس درج کیا گیا تھا۔

بتایاجاتا ہے کہ چوری کی اس واردات کے بعد آندھرا پردیش کا رہنے والا لاری کا کلینر راجو لاپتہ ہوگیا تھا۔لاری ڈرائیور کی شکایت درج کرلینے کے بعد پتور پولیس نے ملزم کی گرفتاری کے لئے جال بچھا رکھا تھا۔ پیر کے دن پولیس کو مصدقہ اطلاع ملی تھی کہ رات میں ملزم راجو میسور و سے کیرالہ کی طرف سفر کررہا ہے۔ اس پر کارروائی کرتے ہوئے پولیس کی ایک ٹیم نے میسورو پہنچ کر ملزم کوگرفتار کرلیا۔ 

 واردات کے چھ ماہ بعد ملزم کو گرفتار کرنے کی یہ کارروائی ضلع ایس پی لکشمی کانت کی رہنمائی اور ڈی وائی ایس پی دینکر شیٹی اور سٹی پولیس اسٹیشن کے انسپکٹر تمپّا نائک کی ہدایات کے مطابق پروبیشنری سب انسپکٹر انجنیا ریڈی اور دیگر اہلکاروں نے انجام دی۔