بھٹکل میں روٹری کلب کی جانب سے سائیکل ریلی، مقررین نے کہا؛ آلودگی سے پاک سماج اور صحت مند ماحول کے لئے سائیکل سواری ضروری
بھٹکل 27/جنوری (ایس او نیوز) سائیکل پر سفر کرتے ہوئے انسان نہ صرف اپنی صحت بنائے رکھ سکتا ہے بلکہ ماحول کو بھی آلودگی سے پاک رکھ سکتا ہے، اسی پیغام کو عام کرنے کے مقصد سے آج یہاں بھٹکل میں روٹری کلب کی جانب سے سائیکل ریلی کا اہتمام کیا گیا جس میں قریب سو لوگوں نے سائیکل کے ذریعے بھٹکل کے مختلف علاقوں سے گذرکر عوام کو سائیکل چلانے کی ترغیب دی۔
صبح 9:30 بجے بھٹکل تعلقہ اسٹدیم المعروف وائی ایم ایس اے میدان سے بھٹکل پولس سب انسپکٹر کوسومادھارا نے ہری جھنڈی دکھاتے ہوئے ریلی کا آغاز کیا، روٹری کلب کی جانب سے سُرخ ٹی شرٹ پہنے طلبا و عوام نے سائیکل پر سوار نوائط کالونی سے نیشنل ہائی وے ہوتے ہوئے شمس الدین سرکل، اولڈ بس اسٹائنڈ، سلطان اسٹریٹ ، ماری کٹہ، کار اسٹریٹ ہوتے ہوئے بھٹکل انجمن میدان پہنچے جہاں روٹری کلب کے ذمہ داران نے خطاب کرتے ہوئے ریلی میں شریک سبھی لوگوں کا شکریہ ادا کیا۔
روٹری کلب کے صدر راجیش نائیک، سکریٹری رویندر نمبیار، ڈاکٹر گوریش پڈکونے، ہائی اسکول کے ہیڈ ماسٹر شبیر دفعدار سمیت دیگر ذمہ داران نے اس موقع پر ماحول کو آلودگی سے پاک رکھنے کے ساتھ ساتھ اپنے علاقوں کو بھی کچروں سے پاک رکھنے کی طرف عوام کی توجہ مبذول کرائی۔ راجیش نائیک نے بتایا کہ سواریوں کے نکلتے دھوئوں سے ماحول کی آلودگی میں روز بروز اضافہ ہورہا ہے، جس کی روک تھام کی طرف سبھی لوگوں کو توجہ دینے کی ضرورت ہے، اسی طرح انہوں نے بتایا کہ انسان کو اپنی صحت بنائے رکھنے کے لئے سائیکل سواری سے زیادہ بہتر کوئی ورزش نہیں ہے۔ اس موقع پر روٹری کے اراکین نذیر قاسمجی، جلال الدین کاسرکوڈ، شاکرحُسین ، عبدالرحمن صدیقی سمیت دیگر کافی ذمہ داران موجود تھے۔
Cycle rally by Rotary club Bhatkal