بنگلورو، 6؍جنوری(سالارنیوز) ریاستی گورنر تھاورچند گہلوٹ نے کہاکہ ملک کی ترقی میں نوجوانوں کا رول بے حد اہم ہے اورنوجوانوں کی طاقت کا مناسب استعمال کرنے سے ہندوستان دنیا بھر میں اونچا مقام حاصل کرسکتا ہے -

تعلقہ کے آدی چن چن گری مٹھ میں منعقد دوروزہ یواجن اتسوا کا افتتاح کرتے ہوئے گورنر گہلوٹ نے اس خیال کا اظہارکیا اور کہاکہ سوامی وویکانندا کی خواہش کے مطابق ملک کو ترقی کی راہ پر لے جانے والے نوجوانوں کی آج ضرورت ہے -یواجن اتسوا کے ذریعہ نوجوانوں کو اقتصادی اورذہنی طورپر مستحکم بنایا جاسکتا ہے - آدی چن چن گری مٹھ نے تعلیمی، مذہبی اورثقافتی شعبہ کی ترقی میں نمایاں رول ادا کیا ہے اور نوجوان لڑکے ولڑکیوں کو قوم کی اصل دھارے میں لانے یہاں مختلف پروگراموں کو منعقد کیا گیا ہے -

اس موقع پرخطاب کرتے ہوئے ریاستی وزیربرائے اسپورٹس ویوتھ ایمپاورمنٹ ڈاکٹر نارائن گوڈا نے کہاکہ حکومت نے نوجوانوں کی ترقی اورفلاح وبہبودی کیلئے کئی پروگراموں کو ترتیب دیا ہے اوریوتھ پالیسی جاری کرنے ڈاکٹر آربال سبرامنیم کی قیادت میں کمیٹی تشکیل دی گئی ہے - 100 لڑکیوں کو پائلٹ کی تربیت دی جائے گی اوراگلے اولمپکس ٹورنمنٹ کیلئے روانہ کرنے 75 بچوں کو گود لیا گیا ہے -محکمہ کنڑا وثقافت کے وزیرسنیل کمار نے خطاب کرتے ہوئے کہاکہ تمام شعبوں میں تبدیلی صرف نوجوان نسل سے ہی ممکن ہے اس سلسلہ میں فلاحی تنظیموں کو آگے آنا چاہئے- آدی چن چن گری مٹھ کے سربراہ ڈاکٹر نرملا نندا سوامی نے جلسہ کی نگرانی کی -

اس موقع پر رکن اسمبلی کے سریش گوڈا، بال سبرامنیم، محکمہ اسپورٹس ویوتھ ایمپاورمنٹ کے ایڈیشنل چیف سکریٹری شالنی رجنیش،کمشنر گوپال کرشنا، ضلع ڈپٹی کمشنر اشوتھی، ضلع سپرنٹنڈنٹ آف پولیس یتیش ودیگر حاضر رہے -