نئی دہلی ، 26؍ستمبر(ایس او نیوز؍ایجنسی) دارالحکومت دہلی کی روہنی کورٹ میں جمعہ کی دوپہر ہونے والی گینگ وار فائرنگ میں دہلی پولیس کے اسپیشل سیل نے کارروائی کرتے ہوئے دو افراد کو گرفتار کرنے کا دعویٰ کیا ہے۔اسپیشل سیل کے ذریعہ پکڑے گئے دونوں افراد کی شناخت امنگ اور ’ونئے ‘کے نام سے ہوئی ہے۔ یہ دونوں شمال مغربی دہلی کے حیدر پور کے رہنے والے ہیں۔

اسپیشل سیل نے دونوں کو عدالت کے گیٹ نمبر 4 کی سی سی ٹی وی فوٹیج کی بنیاد پر گرفتار کیا ہے ، جہاں فائرنگ ہوئی تھی۔خیال رہے کہ جمعہ کی سہ پہر روہنی میں کمرہ عدالت میں جج کے سامنے دو حملہ آوروں نے گینگسٹر جتیندر عرف گوگی (30) کو گولی مار کر ہلاک کر دیا تھا ، جب یہ گینگسٹر پیشی کے لیے آیا ہوا تھا۔ اس سے عدالت میں بھگدڑ مچ گئی۔ دونوں حملہ آوروں کو سپیشل سیل کے کمانڈوز نے کمرہ عدالت میںہی ڈھیر کر دیا تھا ۔بتایا جا رہا ہے کہ دونوں طرف سے 30 سے 35راؤنڈ گولیاں چلائی گئیں۔ دونوں حملہ آور وکیل کے لباس میں آئے تھے اور صبح کمرہ عدالت میں جا کر بیٹھ گئے تھے۔

روہنی ڈسٹرکٹ کے ڈی سی پی پر نو َ تائل نے بتایا کہ دہلی کے ٹاپ 10 گینگسٹرز میں سے ایک جتندر مان گوگی کو اقدام قتل کے ایک معاملے میں روہنی کورٹ روم 207 میں لایا گیا تھا۔ عدالت میں کیس کی سماعت جاری تھی کہ وکیلوں کا لباس میں دو حملہ آوروں نے گوگی پر اندھا دھند فائرنگ شروع کر دی۔بتایا جاتا ہے کہ گوگی کو تین سے چار گولیاں لگیں اور وہ موقع پر ہی دم توڑ گیا۔ جوابی کارروائی میں اسپیشل سیل کے کمانڈوز نے دونوں حملہ آوروں کو ہی فائرنگ کرکے ڈھیر کردیا ، دونوں حملہ آور موقع پر ہی مارے گئے۔