بھٹکل :29؍نومبر(ایس اؤ نیوز) ٹرین  پر سفر کرنے کے دوران  لاکھوں روپئے مالیت کے  زیورات کی بیگ چوری کرکے فرار ہونے کی کوشش اُس وقت ناکام ہوگئی جب  تینوں  ملزم کاروار پولس کے ہتھے چڑھ گئے۔واردات  کاروار کے بیت کھول میں جمعرات کو پیش آئی۔

ملزموں کی شناخت اترپردیش کے دلیپ شاہ ، کلوُّ اور مقدر کی حیثیت سے کی گئی  ہے۔ موصولہ اطلاعات کے مطابق جمعرات کی صبح قریب پانچ بجے  بھٹکل تعلقہ کے مرڈیشور ریلوے اسٹیشن کے قریب  ممبئی سے منگلورو جانے  والی متسی گندھا ایکسپرس ٹرین میں سفر کررہی  اُڈپی کی چئیترا شٹی اور انیتا سالیان کی وانٹی بیگ کو کچھ  چوروں نے  چرا لیا اور مرڈیشور ریلوے اسٹیشن پر اُتر کر فرار ہوگئے۔ بتایا گیا ہے کہ چور مرڈیشور اسٹیشن میں اُترنے کے بعد گوا جانے والی بس پر سوار ہوگئے، مگر جیسے ہی اُن کی بس کاروار پہنچی، پولس ان کے انتظار میں موجود تھی۔

دراصل ممبئی امیر باغ  کی مکین چئیترا شٹی اپنے شوہر دیوراج کے ساتھ اُڈپی  جارہی تھی کہ   مرڈیشور اسٹیشن کے قریب چلتی ٹرین پر  چوری کی واردات پیش آئی۔چئیترا نے مرڈیشوراسٹیشن پر اُتر کر  پولس تھانے میں شکایت درج کرائی  اور  پولس حرکت میں آ گئی ۔ بتایا گیا ہے کہ پولس نے چوروں کا پیچھا کرتے ہوئے  کاروار کے بیت کھول بندرگاہ پر بس کو روک دیا اور  تینوں ملزموں کو گرفتار کرلیا۔

پولس نے بتایا کہ گرفتار شدگان  میں دلیپ نامی ملزم پر ریلوے ڈکیتی کولےکر 17معاملات درج ہیں۔ مقدر بھی چوری میں شاطر بتایاگیا ہے۔تھانےمیں شکایت  درج کرنے کے صرف چند گھنٹوں میں ہی ملزموں کو گرفتار کرنے پر عوام ستائش کررہے ہیں۔

شکایت کے مطابق   چوری کئے گئے  زیورات کی کل قیمت 1.80 لاکھ روپئے  ہے اس کے علاوہ 35ہزارروپئے نقد بھی بیگ میں موجود تھے بتایا گیا ہےکہ بیگ  میں 4پون وزنی سونے کا منگل سوترا، 20گرام وزنی سونے کا ہار، 3گرام  سونے کی انگوٹھی، 6گرام سونے کے آویزے ،40گرام سونے کی چوڑیاں ، لیڈیز پرس میں ایک ہزار نقد اور جینٹس پرس میں 35ہزار روپئے نقد، ایک سم  سنگ موبائیل، ایک میکرو میکس  موبائیل، ایک لینوا موبائیل چوری شدہ بیگ میں موجود تھے ۔