بھٹکل 27/جنوری (ایس او نیوز)  بھٹکل میں آئے دن چوری کی وارداتوں میں مسلسل اضافہ ہورہا ہے اور عوام پولس پر چوروں کے ساتھ سازباز کرنے کا الزام لگا نے کا سلسلہ بھی جاری ہے،اس درمیان  چوری کی تازہ  واردات مدینہ کالونی سے آگے مسجد ابوبکر کے پیچھے پیش آئی ہے، جس میں چوروں نے حنیف آباد کے قریب رحمت آباد میں واقع ایک مکان کو اُس وقت نشانہ بنایا جب گھرکی ایک خاتون اچانک بیمار ہوجانے سے گھروالوں کو ایمرجنسی میں گھر کو تالہ لگا کر خاتون کو مینگلور لے جانا پڑا۔

بتایا گیا ہے کہ سید محسن برماور کی ملکیت والے اس مکان سے چار لاکھ سے زائد مالیت کی چوری  ہوئی ہے۔

جناب سٹی میڈیکل اقبال نے ساحل آن لائن کو  بتایا کہ  اُن کی ماں کی طبعیت کل جمعہ شام کو اچانک خراب ہوجانے کی وجہ سے وہ اپنی بہن کے ساتھ ماں کو ساتھ لے کر مینگلور اسپتال گیا تھا، گھر پر چونکہ کوئی نہیں  تھا، اسی کا فائدہ اُٹھاکر چوروں نے  پوری تجوری کو ہی  اُٹھا کر لے گئے۔ تجوری میں قریب تین لاکھ سے زائد مالیت کے سونے کے زیورات سمیت  چار ہزار روپیہ نقد رقم، گھر کے کاغذات، ساتھ ساتھ ایک پاسپورٹ بھی تھا۔

مشاہدہ سے پتہ چلا ہے کہ چور پہلے  داخلی دروازے کی کُنڈی توڑ کر اندر داخل ہوئے، پھر  دوسرے دروازے کی کُنڈی بھی توڑ کر اندر پہنچے اور الماری کو نقصان پہنچاتے ہوئے اُس کے اندر کی پوری تجوری کو ہی اُٹھا کر لے گئے۔بتایا گیا ہے کہ تجوری میں دو سونے کے نیکلس، کانوں کی بالیاں، ایک انگوٹھی سمیت ایک پاسپورٹ کے ساتھ ساتھ کافی ضروری کاغذات تھے۔

بتایا گیا ہے کہ آج شام کو کچرہ چُننے کے لئے آئے ہوئے کچھ لوگوں نے  سید محسن کے پڑوسیوں کو خبر دی کہ اس  مکان کا دروازہ تھوڑا بہت ٹوٹا ہے ، انہوں نے شکوک و شبہات کا اظہار کیا تو  پڑوسیوں نے قریب جاکر دیکھا تو پتہ چلا کہ اس مکان میں چوری کی واردات انجام دی گئ ہے۔ جناب سٹی میڈیکل اقبال صاحب نے بتایا کہ گھر کے سبھی افراد مینگلو رمیں ہی ہیں۔  ان کے مطابق چوروں نے جس طرح گھروالوں کے مینگلور جاتے ہی گھر کو نشانہ بنایا ہے، اُس کو دیکھتے ہوئے یقین کے ساتھ کہا جاسکتا ہے کہ علاقہ کے ہی کچھ لوگ  چوری میں ملوث ہیں۔

واقعے کی اطلاع ملتے ہی کافی بڑی تعداد میں لوگ جمع ہوگئے، بھٹکل کے نئے سرکل پولس انسپکٹر کے ایل گنیش ، پی ایس آئی منجپا سمیت پولس کے دیگر حکام بھی موقع پر پہنچے اور تفصیلات حاصل کی۔ عوام اس بات پر برہم تھے کہ بھٹکل میں مسلسل چوریوں کی وارداتیں رونما ہورہی ہیں مگر نہ پولس کوئی کاروائی کررہی ہے اور نہ ہی مقامی سماجی ادارے پولس پر دبائو بنارہے ہیں۔

خیال رہے کہ ایک ہفتہ میں  بھٹکل میں یہ چوتھی چوری کی واردات پیش آئی ہے، دو روز قبل بندرروڈ پر پیش آئی چوری کی واردات میں چوروں نے گھر کی الماری میں موجود 25 ہزار نقد رقم پر ہاتھ صاف کیا تھا، جبکہ اُس سے تین روز قبل  نور مسجد کے بالمقابل دو مکانوں پر بھی چوری کی واردات پیش آئی تھی، جس  میں چوروں کو گھروں کے اندر کچھ نہیں مل سکا تھا، اُس سے کچھ روز قبل ہی بھٹکل بندر روڈ پر ایک اور مکان کو چوروں نے نشانہ بنایا تھا، مگر وہاں بھی چوروں کے ہاتھ کچھ نہیں لگا تھا، البتہ گھر کے کمپائونڈ پر پارک کی گئی کار کا شیشہ توڑ کر کار کی تلاشی لی گئی تھی۔