بلند شہر: کیدارناتھ کے درشن کے لیے جا رہی کار حادثہ کی شکار، 5 افراد جاں بحق
بلندشہر، 24؍ مئی (ایس او نیوز؍ایجنسی) اتر پردیش کے بلند شہر ضلع میں بدری ناتھ اور کیدارناتھ یاتریوں کو لے جانے والی ایک اسکارپیو کار منگل کی علی الصبح ہائی وے پر کھڑے ٹرک سے ٹکرا گئی، جس میں پانچ افراد کی موت ہو گئی اور چھ دیگر زخمی ہو گئے۔
ضلع مجسٹریٹ سی پی سنگھ نے بتایا کہ عقیدت مندوں کو لے جانے والی اسکارپیو کار صبح تقریباً 4.30 بجے بلند شہر میرٹھ ہائی وے پر کھڑے ٹرک سے ٹکرا گئی۔ یہ واقعہ ہائی وے نمبر 235 پر بلند شہر کے برال گاؤں کے قریب پیش آیا۔ ہلاک اور زخمی ہونے والوں میں ایک ہی خاندان کے افراد بھی شامل ہیں۔
اس دردناک حادثے میں ایک خاتون اور دو بچوں سمیت 5 افراد جاں بحق جب کہ 6 دیگر مسافر زخمی ہوگئے۔ زخمیوں میں سے تین کی حالت تشویشناک ہے۔ مرنے والوں کی شناخت ہاردک مہور (3 سال) اور ونش مہور (5 سال) ولد ہریندر، ساکن دیوی پورہ، بلند شہر، شالو (21 سال) بیٹی امیش کمار، ساکن دیوی پورہ، بلند شہر، ہمانشو اگروال (25 سال) ولد نیرج اگروال، رہائشی آواس وکاس، بلند شہر اور شکوہ آباد کے رہنے والے پارس (22 سال) ولد اوم پرکاش کے طور پر ہوئی ہے۔
؎واقعہ کی اطلاع ملتے ہی ضلع مجسٹریٹ اور دیگر اعلیٰ انتظامی افسران موقع پر پہنچ گئے اور راحت اور بچاؤ کام شروع کیا۔ زخمیوں کو علاج کے لیے مقامی اسپتال بھیج دیا گیا ہے۔ شدید زخمیوں میں ہریندر (31 سال)ولد روشن لال، ان کی بیوی رنکی (28 سال) اور بہن بیبی (11 سال) شامل ہیں۔ مرنے والے پارس کی بہن سنکی (27 سال) اور دامنی (20 سال) زخمیوں میں شامل ہیں۔
وزیر اعلی یوگی آدتیہ ناتھ نے اس واقعہ پر گہرے دکھ کا اظہار کیا ہے۔ انہوں نے جاں بحق افراد کے سوگوار خاندانوں سے تعزیت کا اظہار کرتے ہوئے ضلعی انتظامیہ کو ہدایت کی ہے کہ حادثے میں زخمی ہونے والوں کو مناسب علاج فراہم کیا جائے۔