بھٹکل 7 جولائی (ایس او نیوز) کنداپور کے قریب تفریحی مقام تراسی سے بھٹکل آنے کے دوران ایک کار حادثہ کا شکار ہوگئی جس میں موجود تین لوگ زخمی ہوگئے ہیں، تینوں کو کنداپور اسپتال لے جایا گیا ہے۔
موسلادھار بارش کے چلتے آج منگل کو تینوں ساحلی اضلاع میں اسکولوں اور کالجوں میں چھٹی کا اعلان کیا گیا تھا، سمجھا جارہا ہے کہ چھٹی ہونے کی بنا پر بھٹکل کی ایک کالج کے طلبہ تفریح کے لئے تراسی پہنچے تھے، واپس آنے کے دوران ناوندہ نیشنل ہائی وے پر ان کی کار آگے والی بس سے پیچھے سے ٹکراگئی۔ حادثے میں کار کے اگلے حصے کے پرخچے اُڑگئے ہیں، مگر کار پر سوار لوگ معمولی طور پر زخمی ہوکر محفوظ رہ گئے۔ ایک عینی شاہد نے بتایا کہ آگے والی بس نے اچانک کنارے پر بس روک دی تھی، جس کی بنا پر پیچھے سے آرہی ان کی کار بس سے ٹکراگئی۔
حادثے کے فوری بعد حادثے کے فوٹوز سوشیل میڈیا پر وائرل ہوگئیں، ساتھ میں ایک آڈیو کلپ بھی وائر ل ہوگئی جس میں حادثے کے تعلق سے خبر دی گئی تھی۔
اسپتال میں شفٹ کرنے والے ایک نوجوان نے ساحل آن لائن سے فون پر گفتگو کرتےہوئے بتایا کہ کار کی اگلی سیٹ پر ڈرائیور سمیت دو طلبہ تھے، جبکہ پچھلی سیٹ پر پانچ طالبات تھیں۔ حادثے میں اگلی سیٹ پر سوار دونوں لڑکوں کو چوٹیں آئی ہیں، اسی طرح پچھلی سیٹ پر سوار ایک طالبہ کا پاوں فریکچر ہوا ہے۔
حادثے کے فوری بعد مقامی لوگ ان کی مدد کو پہنچ گئے تھے اور تینوں زخمیوں کو کنداپور کے ایک نجی اسپتال میں شفٹ کرایا گیا۔ اسپتال میں موجود ایک عینی شاہد نے بتایا کہ اگلی سیٹ پر سوار دو لڑکوں کے چہروں اور دیگربعض حصوں میں چوٹیں آئی ہیں، البتہ چوٹیں زیادہ نہیں ہیں اور سبھی لوگ اللہ کے کرم سے محفوظ ہیں۔