کرناٹک کابینہ میں توسیع کے بعد ’’کانگریس میں برگشتگی ‘‘ پرمیشور اور یڈیورپا میں زبردست لفظی جنگ
بنگلورو۔22؍دسمبر(ایس او نیوز) ریاستی کابینہ میں توسیع کے بعد کانگریس میں اٹھنے والے طوفان برگشتگی پرسابق وزیر اعلیٰ اور ریاستی بی جے پی صدر بی ایس یڈیورپا کا تبصرہ ان کے اور نائب وزیراعلیٰ ڈاکٹر جی پرمیشور کے درمیان زبردست لفظی جنگ کا سبب بن گیا۔
ریاستی کابینہ میں توسیع کے اعلان کے بعد بعض برگشتہ کانگریس اراکین اسمبلی کے بیانات کا حوالہ دیتے ہوئے یڈیورپانے کانگریس کی حالت پر ترس کا اظہار کیا تھا اور کہاتھاکہ بہت جلد مخلوط حکومت اپنے ہی تضاد کی نذر ہوجائے گی۔ دہلی سے لوٹنے کے بعد اخباری نمائندوں سے بات چیت کرتے ہوئے ڈاکٹر پرمیشور نے یڈیورپا کے بیان پر اپنا سخت ردعمل ظاہر کیا اور کہاکہ یڈیورپا کو کانگریس کی فکر کرنے کی کوئی ضرورت نہیں۔ اگر یڈیورپا کو کانگریس پارٹی کی اتنی ہی زیادہ فکر ہے تو وہ کانگریس میں شامل ہوجائیں ساتھ بیٹھ کر فکر کرتے ہیں۔ اس کے جواب میں یڈیورپا نے بھی کہاکہ پرمیشور سے وہ بہت گہری ہمدردی رکھتے ہیں ، اسی لئے ان کو مشورہ دینا چاہیں گے کہ کانگریس کی ڈوبتی کشتی سے باہر آئیں اور بی جے پی میں شامل ہوجائیں۔
