خلیج سے واپس لوٹنے والوں کو کاروار میں کیاجائے گا کوارنٹین۔ پہلے مرحلے میں آئیں گے 3000افراد
کاروار،3؍مئی (ایس او نیوز) خلیجی ممالک میں پھنسے ہوئے ہندوستانیوں کو ملک میں واپس لانے کے لئے مرکزی حکومت تیاریاں کررہی ہیں۔ پتہ چلا ہے کہ بحریہ کے جہازوں کے ذریعے پہلے مرحلے میں دبئی سےتین ہزار مسافروں کو لایا جائے گاجو کرناٹکا، تلنگانہ اور آندھرا پردیش کے باشندے ہونگے۔اور ان سب کو کاروار اور منگلورو کی بندرگاہوں پر اتارا جائے گا۔
جنوبی کینرا کے ڈپٹی کمشنر کے مطابق اس میں سے تقریباً 1000مسافروں کو کاروارمیں اور بقیہ مسافروں کو منگلورو میں کوارنٹین کیا جائے گا۔چونکہ ممبئی اور گجرات میں کورونا کی وباء شدت اختیار کرگئی ہے اور متاثرین کی تعداد بڑھتی جارہی ہے اس لئے ان علاقوں کو ریڈ زون میں رکھا گیا ہے۔ لہٰذاماناجارہا ہے کہ خلیج سے لوٹنے والے مسافروں کو ان ریاستوں میں اتارنے سے مزید خطرناک نتائج برآمد ہونگے۔جہاں تک گوا اور مہاراشٹرا سے تعلق رکھنے والے مسافروں کی بات ہے ان لوگوں کو گوا کی بندرگاہ پر اتارے جانے کی توقع ہے۔
کاروار میں جن لوگوں کو اتارا جائے گا ان میں سے زیادہ تر لوگوں بحری اڈے پر دستیاب سہولت میں کوارنٹین کیے جانے کی بات سننے میں آرہی ہے۔ ریاست میں تاحال کورونا متاثرین کی تعداد 600 ہے جس پر قابو پانے کی جان توڑ کوشش کی جارہی ہے۔ لیکن اس دوران ہزاروں لوگ جب بیرونی ممالک سے وطن لوٹ آئیں گے تو ظاہر سی بات ہے کہ ان کی صحت کی نگرانی، طبی جانچ اور وباء کو مزید پھیلنے سے روکنے کے اقدامات بڑے پیمانے پر کرنے ہونگے جو سرکاری افسران کے لئے ایک نیا سر درد ثابت ہونے جارہا ہے۔
کاروار میڈیکل کالج اسپتال کی لیباریٹری میں اب کووِڈ 19کی جانچ کرنے کے لئے سہولت فراہم کی گئی ہے، جس سے ایک دو گھنٹے کے اندر ہی جانچ رپورٹ مل جائے گی۔ اور علاج کے لئے بھی خصوصی وارڈ قائم کیے گئے ہیں۔ خلیجی ممالک سے کاروار بندرگاہ پر مسافروں کے اترنے کے بعد ان کی ابتدائی جانچ کی جائے گی اور پھر انہیں کاروار میں ہی کوارنٹین کرنے یا پھر ان کے اپنے مقامات پر لے جاکر28دن کے لئے کوارنٹین کرنے کا فیصلہ کیاجائے گا، اس کے بارے میں ابھی قطعی طور پر کوئی بات معلوم نہیں ہوئی ہے۔گلف سے ملنے والی رپورٹوں کے مطابق تاحال تقریباً 1.5لاکھ لوگوں نے ملک واپسی کی خواہش ظاہر کی ہے جس کے لئے انہوں نے آن لائن رجسٹریشن کیا ہے۔