اب بنگلورو سے لوٹنے پر بھی کرنا ہوگا کورونا ٹیسٹ۔ ضلع شمالی کینرا کے ڈی سی نے جاری کیا حکم
کاروار،28؍جون (ایس او نیوز) اب تک دوسری ریاستوں اور بیرون ملک سے ضلع شمالی کینرا میں لوٹنے والوں کے لئے کوارنٹین اور کووِڈ جانچ کرنا لازمی تھا۔ لیکن اب بنگلو رو میں کورونا روز افزوں پھیلاؤ کو دیکھتے ہوئے ڈپٹی کمشنر نے حکم جاری کیا ہے کہ اب بنگلورو جاکر واپس لوٹنے والوں کے لئے بھی سرکاری اسپتال میں پہنچ کر کورونا ٹیسٹ کرنا ضروری ہوگا۔
خیال رہے کہ کچھ دن پہلے یلاپور کے ایک سرکاری بس کنڈکٹر کو بنگلورو جاکر واپس لوٹنے کے بعد کورونا کا مرض لاحق ہوگیا تھا اور اس کا رابطہ بہت سارے لوگوں سے ہوجانے کی وجہ سے ضلع انتظامیہ کو بہت زیادہ پریشانی لاحق ہوگئی تھی۔اس کے علاوہ منگلورو جاکر واپس لوٹنے والے انکولہ کے ایک شخص کی رپورٹ جمعہ کے دن پوزیٹیو آگئی ہے۔ یہ شخص بھی رپورٹ آنے سے پہلے مرض کے تعلق سے بے پروائی کا مظاہرہ کرتے ہوئے کمٹہ اور انکولہ کے کئی علاقوں میں گھومتا پھرتا رہا تھا۔ان دونوں معاملات کو سنجیدگی سے لیتے ہوئے ضلع انتظامیہ نے احتیاطی اقدام کے طور پرفیصلہ کیا ہے کہ بنگلورو سے لوٹنے والوں کے لئے جانچ کو لازمی کردیاجائے۔اس سلسلے میں تمام تعلقہ جات میں انتظامیہ کو ہدایات جاری کردی گئی ہیں۔بنگلورو سے واپس لوٹنے بس پر جو لوگ ضلع میں پہنچیں گے انہیں چاہیے کہ فوری طور پر سرکاری اسپتال جائیں اور وہاں پر اپنی جانچ کروائیں۔ اسپتال میں جانچ کے بعد گھرجانے والوں میں اگر مرض کی علامات پیدا ہوئیں تو جلدا زجلد انہیں اسپتال لاکر آئسولیشن میں رکھنے کا کام کیا جائے گا تا کہ یہ مرض پھر دوسرے لوگوں میں پھیلنے نہ پائے۔
اس کے علاوہ صرف بنگلورو ہی نہیں بلکہ ضلع کے باہر کے جن مقامات سے بھی لوگ یہاں آئیں گے ان کی نگرانی کرنے کی ذمہ داری ٹاسک فورس کے اراکین، تعلقہ انتظامیہ اور ضلع انتظامیہ کے علم لانے کے احکام جاری کیے گئے ہیں۔ جو لوگ ضلع کے اندر ہی کسی ایک مقام پر قیام کرنے کے بعد دوسرے گاؤں میں چلے آئے ہوں ان لوگوں کی بھی نگرانی کرنے اور ضلع انتظامیہ کو معلومات فراہم کی ہدایات دی گئی ہیں۔
