بھٹکل، 26؍جنوری (ایس او نیوز) شمالی کینرا ضلع انچارج وزیر شیورام ہیبارنےریوینیو وزیر آر اشوک سے مطالبہ کیا کہ ضلع میں زمین کی ملکیت سے متعلق ای۔پراپرٹی، ہاڈی، فارم نمبر 3 وغیرہ کے مسائل جلد حل کیے جائیں۔

منی ودھان سودھا کے افتتاح کے موقع پر منعقدہ پروگرام میں خطاب کرتے ہوئے شیورام ہیبار نے کہا کہ ای۔پراپرٹی کا قانون ضلع کے عوام  کے لئے بہت سے مسائل کا سبب بن گیا ہے، اس لئے شمالی کینرا کو اس قانون سے مستثنیٰ کردیا جائے۔ اسی طرح بہت سے لوگ ہاڈی، کومکی، اسکیم لینڈ وغیرہ پر رہائش پزیر ہیں۔ اس سرکاری زمین پر کھیتی باڑی کرنے والے ان لوگوں کو زمینی حقوق والے دستاویز دئے جائِیں گے تو بڑی سہولت ہوگی۔

شیورام ہیبار نے بتایا کہ کاروار میں ضلع ایڈمنسٹریٹیو آفس کے لئے 25 کروڑ روپے منظور ہوئے ہیں اور تمام تعلقہ جات میں منی ودھان سودھا تعمیر کرنا منظور کیا گیا ہے۔

رکن اسمبلی سنیل نائک نے بھی اپنے خطاب کے دوران ای۔پراپرٹی کا مسئلہ اٹھاتے  ہوئے کہا اس کے عوام کوبہت دشواریوں کا سامنا ہے۔ اس لئے اس قانون کو آسان بنایا جانا چاہیے۔

اس مسئلہ بولتے ہوئے وزیر مالگزاری آر اشوک نے کہا کہ ضلع شمالی کینرا میں ای۔ پراپرٹی قانون سے درپیش مسائل سے ضلع انچارج وزیر اور اراکین اسمبلی  نے مجھے آگاہ کیا ہے۔ میری بھی خواہش ہے کہ اس مسئلہ کو حل کیا جانا چاہیے۔ میں عوامی مفادات کے حق میں ہوں۔ لیکن اس میں کچھ پیچیدگیاں ہیں، انہیں حکومتی سطح پر حل کرنے کی کوشش کروں گا۔