کاروار اور اڈپی کے درمیان ریزرو پولیس اسٹیشن قائم کیا جائے گا۔ وزیر داخلہ بسواراج بومائی کابیان
کمٹہ 2/نومبر(ایس او نیوز) وزیر داخلہ بسواراج بومائی نے بھٹکل سے یلاپور کی طرف سفر کے دوران کمٹہ میں تھوڑی دیر کے لئے رک کر یہاں کے پولیس اسٹیشن کا دورہ کیا اوروہاں گارڈف آنر لینے کے بعد رکن اسمبلی دینکر شیٹی کے گھر پہنچ کر ان سے ملاقات کی۔
اس موقع پر اخباری نمائندوں سے بات چیت کرتے ہوئے مسٹر بومئی نے کہا ”کوسٹل سیکیوریٹی گارڈ کو زیادہ تعداد میں تیز رفتار کشتیاں (اسپیڈ بوٹس) فراہم کی جائیں گی۔اس مرتبہ بجٹ میں ایک ہزار پولیس سب انسپکٹر ز اور 16ہزار پولیس اہلکاروں کا تقررکرنے کی گنجائش رکھی گئی ہے۔ میں نے جب سے وزیر داخلہ کا قلمدان سنبھالا ہے، پولیس افسران کو سخت ہدایت دے رکھی ہے کہ اگر ایک عام آدمی بھی پولیس اسٹیشن میں پہنچ کر شکایت کرتا ہے تو اسے درج کرلینا چاہیے۔ اس کے علاوہ اب آن لائن شکایتیں بھی درج کی جاسکتی ہیں۔“
ضلع پنچایت رکن گجانن پائی نے وزیرداخلہ کی توجہ مبذول کرواتے ہوئے کہا کہ کمٹہ کے کتگال میں پولیس تھانے کی عمارت خستہ ہوکر گرنے کی حالت کو پہنچ گئی ہے۔ جبکہ بی جے پی تعلقہ صدر کمار مارکنڈے اور یوتھ ونگ کے صدر ہیمنت گاؤنکر نے وزیر موصوف سے درخواست کی کہ ہوناور پریش میستا کی موت کے پس منظر میں کمٹہ میں ہوئے فساد کے بعدبی جے پی کے تقریباً 300کارکنا ن پر مقدمات درج کیے گئے تھے۔ ان مقدمات کو واپس لیا جائے۔اس پر ردعمل ظاہر کرتے ہوئے وزیر داخلہ نے بتایا کہ اس موضوع پر کابینہ میں زیر بحث لانے کے بعد اس کے بارے میں فیصلہ کیا جائے گا۔
اس موقع پرضلع ایس پی شیو پرکاش دیوراج،ایڈیشنل ایس پی گوپال بیاکوڈ، سرکل پولیس انسپکٹر پرمیشور گونگا، سب انسپکٹر ای سی سمپت، رکن اسمبلی دینکر شیٹی کے علاوہ بی جے پی لیڈران دامودر نائک، جی جی ہیگڈے، سدھیر پنڈت، گجانن گونگاوغیرہ موجود تھے۔