کاروار:26؍جنوری(ایس اؤ نیوز)ڈاکٹر بی آر امبیڈکر کی قیادت میں تشکیل دئیے گئے دستور کی وجہ سے ہی ایک عام آدمی سمیت خواتین وغیرہ سیاست وغیرہ میں شریک ہوکر اعلیٰ مقام حاصل کرنا ممکن  ہے، ان خیالات کا اظہار وزیر برائے خواتین اور اُترکنڑا ضلع نگراں کار وزیر ششی کلا جولے نے   کیا۔

وہ یہاں  اتوار 26جنوری کو شہر کے پولس پریڈ میدان میں 71ویں یوم ِ جمہوریہ کے موقع پر پرچم کشائی کے بعد خطاب کررہی تھیں۔ موصوف وزیر نے کہاکہ کثرت میں وحدت کا تصور ہمارے دستور کی خاصیت ہے، اسی طرح ملک کے  ہر ایک  شہری کو چاہئے کہ وہ  دستوری فرائض کو بھی ادا کرنےکی طرف توجہ دیں۔ انہوں نے سیلاب کے موقع پر اور بعد میں راحت کاری کےکاموں کو تندہی سے انجام دینے پر ضلعی  انتظامیہ کی ستائش کی۔

پرچم کشائی کے بعد وزیر ششی کلا جولے نے کھلی جیپ میں پولس دستوں کے طرف سے سلامی لی۔ 16پولس دستوں کا مارچ پاسٹ قابل دید تھا۔ پدم شری ایوارڈ سے نوازی گئی انکولہ تعلقہ ہونلی دیہات کی تلسی گوڈا کی ضلع انتظامیہ کی طرف سے تہنیت کی گئی ۔ اسکول و کالج طلبا و طالبات کی طرف سے پیش کئے گئے  دلچسپ ثقافتی پروگرام کی  عوام نے ستائش کی۔

ضلع میں بہتر سرکاری خدمات انجام دینے والے 10افسران ، سماجی خدمتگاروںو غیرہ کی تہنیت کی گئی ۔ رکن اسمبلی روپالی نائک، ضلع پنچایت صدر جئے شری موگیر، تعلقہ پنچایت صدر پرمیلا نائک ، ڈپٹی کمشنر ڈاکٹر ہریش کمار، ایس  پی شیو پرکاش دیوراج، ضلع پنچایت سی ای اؤ محمد روشن اور کاروار اسسٹنٹ کمشنر ایم پریانگا ڈائس پر موجود تھے۔