رائچورعدالت میں ترنگا جھنڈا لہرانے کےلئے ہٹانی پڑی امبیڈکر کی تصویر، دلت تنظیموں نے احتجاجاً کیا والک آؤٹ
رائچور27؍ جنوری (ایس او نیوز) یہاں کے ضلعی عدالت کے ایک جج نے امبیڈ کر کی تصویر کو ہٹانے کا مطالبہ کرتے ہوئے پرچم کشائی کی رسم ادا کرنے سے انکار کردیا جس کے بعد امبیڈکر کی تصویر کو ہٹا کر ہی ترنگا جھنڈا لہرانے کی تقریب کو آگے بڑھانا پڑا۔ اس تعلق سے ایک وڈیو سوشیل میڈیا پر بھی وائرل ہورہا ہے۔
ملک کے73 ویں یوم جمہوریہ کے موقع پر رائچور کی ضلعی عدالت میں منعقدہ یوم جمہوریہ کی تقریب کے دوران یہ واقع رونما ہوا۔ تقریب میں مہاتما گاندھی کی تصویر کے ساتھ ساتھ آئین کی بنیاد تشکیل دینے والے ڈاکٹر بی آرامیڈکر کی تصویرلگی ہوئی تھی، لیکن اس تقریب میں پھول چڑھانے سے انکار کرتے ہوئے یہاں کے ضلعی عدالت کے سینئر اور سیشن کورٹ کے جج ملکارجن گوڑا نے ڈاکٹر بی آر امبیڈ کی تصویر ہٹانے کی مانگ کرنے لگے اور تصویر نہیں ہٹائی گئی تو پرچم کشائی کرنے سے انکار کردیا ۔
ان کے اصرار پر مجبوراً تقریب کے آرگنائزر کوامبیڈکر کی تصویر کو ہٹانا پڑا ۔ حج کے اس اقدام پر ناراض وہاں موجود ایس سی ، ایس ٹی اور درج فہرست ذاتوں کے وکلاء اور دیگر گروپوں نے موقع پر احتجاج کرنے لگے اوراسی کے ساتھ پرچم کشائی کے پروگرام سے باہر چلے گئے۔ جس کی ویڈیوبھی سوشیل میڈیا پر گردش کررہی ہے۔
واضح ہو کہ یوم جمہوریہ پر امبیڈکر کی تصویر لگائی جائے یا نہیں اس پر بحث ہوتی رہی ہے۔ گزشتہ سال ریاستی حکومت نے بھی کہا تھا کہ یوم جمہوریہ پر امبیڈکر کی تصویر لگائی جانی چاہیے۔ لہذا امسال امبیڈکر کی تصویر کو یوم جمہوریہ کی تقریبات کے دوران رکھتے ہوئے اعزاز سے نواز گیا ہے۔