میسورو،26نومبر (ایس او نیوز؍یو این آئی) گردابی طوفان ”نیوار“کے بدھ کے روز تمل ناڈو اور پڈوچیری سے گزرنے کے پیش کرناٹک میں ریڈ الرٹ جاری کیا گیا ہے۔وزیر اعلیٰ بی ایس ایڈی یورپا نے آج یہاں میڈیا سے بات چیت میں کہا کہ متعلقہ عہدیداروں کو کسی بھی صورتحال کے لئے تیار رہنے کو کہا گیا ہے۔ایک سوال کے جواب میں ایڈی یورپا نے کہا کہ”کیا ہم اس طوفان کو روک سکتے ہیں؟ ہم زیادہ سے زیادہ نقصان سے بچنے کے لئے جو بھی احتیاطی تدابیر اختیار کر رہے ہیں وہ کر رہے ہیں۔ متعلقہ حکام کو ساحلی کرناٹک میں ’ریڈ الرٹ‘کا اعلان کرنے کے لیے کہا گیا ہے“۔انہوں نے یہ بھی بتایا کہ”ہم 25 ریاستی بورڈوں اور کارپوریشنوں کے لئے اضافی چیرپرسن کی تقرری کا منصوبہ بنا رہے ہیں، اس سلسلے میں شام تک حکم جاری کردیا جائے گا اور تمام اہل امیدواروں کو موقع دیا جائے گا“۔ کابینہ میں توسیع کے بارے میں انہوں نے کہا کہ کابینہ میں دو سے تین دن میں توسیع کی جائے گی۔دریں اثنا ء ایڈی یورپا نے بی ایس پرمشویا کو نو تشکیل شدہ کرناٹک ویراشائیوا۔لنگایت ترقیاتی کارپوریشن کا صدر بھی مقرر کیا۔ کارپوریشن کی تشکیل ریاست میں سیاسی طور پر بااثر برادری کی ہمہ جہت ترقی کے لئے کی گئی ہے۔ حکومت نے اس کارپوریشن کے لئے پہلے ہی 500 کروڑ روپئے مختص کردیا ہے۔