امسال کرناٹک کی انجینئرنگ کالجوں میں ریکارڈ تعداد میں سیٹیں خالی؛ بھٹکل انجمن انجینرنگ کالج میں بھی سیٹیں دستیاب
بھٹکل 9 جنوری (ایس او نیوز) قومی سطح پر تکنیکی تعلیم کے لیے بڑھتے ہوئے رحجان کے باوجود کرناٹک میں اس تعلیمی سال کے دوران انجینئرنگ کالجوں میں 23,000 نشستیں خالی رہ گئی ہیں اس میں بھٹکل انجمن انجینرنگ کالج بھی شامل ہے۔
ریاست میں انجینئرنگ میں داخلے کے اہل طلباء کی تعداد اس سال نہ صرف زیادہ ہے بلکہ نوجوان زیادہ تر انجینرنگ کالج جانے کو ہی ترجیح بھی دے رہے ہیں، اس کے باوجود اتنی بڑی تعداد میں سیٹیں خالی ہونے سے کالج انتظامیہ بھی پریشان ہے۔
ایسے میں حکومت کی طرف سے تمام طلباء کو ترقی دینے کا فیصلہ کرنے کے بعد UG-NEET کاؤنسلنگ میں کئی طلبہ میڈیکل کالجوں کا رُخ کرنے کا بھی امکان ہے، جس کے بعد انجینرنگ کی مزید نشستیں خالی ہونے کا امکان ظاہر کیا گیا ہے۔
ریاست کرناٹک کی اہم اور بہترین انجینئرنگ کالجوں میں بھٹکل انجمن انجینئرنگ کالج کا بھی شمار ہوتا ہے جس کی شروعات 1980 میں ہوئی تھی اس کالج میں سیول انجینئرنگ، الیکٹریکل (الیکٹرانکس اینڈ پاور) انجینئرنگ، الیکٹرانکس اینڈ کمیونیکشن انجینئرنگ، میکانیکل انجینئرنگ اور کمپوٹر سائنس یعنی پانچ شعبے ہیں۔ پتہ چلا ہے کہ ان میں سے کمپوٹرسائنس کی تمام سیٹیں فُل ہوچکی ہیں، البتہ دیگر شعبوں میں سیٹیں دستیاب ہیں اورانجینرنگ کالج میں داخلہ کے اہل طلبہ راست انجمن دفتر پہنچ کرداخلہ لے سکتے ہیں۔
بتاتے چلیں کہ کرناٹک ایگزامینیشن اتھارٹی (KEA) نے کرناٹک کی انجینئرنگ کی سیٹوں کو پُر کرنے کے لیے اس سال کونسلنگ کے تین دور کیے تھے۔ تاہم، دو سرکاری راؤنڈز کی تکمیل کے بعد، ریاستی حکومت نے سپریم کورٹ سے انجینئرنگ کے داخلوں کی آخری تاریخ میں توسیع کرنے کی اجازت طلب کی اور 31 دسمبر 2021 تک کاؤنسلنگ کا دوسرا توسیعی راؤنڈ (یعنی تیسرا دور) بھی مکمل کرلیا تاکہ خالی جگہوں کو پُر کیا جا سکے۔ مگر تشویش کی بات یہ ہے کہ ریاستی حکومت کی انتھک کوششوں کے باوجود انجینئرنگ کی 23,001 سیٹیں اب بھی پُر نہیں ہوپائی ہیں۔
KEA سے حاصل کردہ ڈیٹا کے مطابق، انجینئرنگ کی خالی نشستوں کی تعداد پچھلے پانچ سالوں میں سب سے زیادہ ہے۔ محکمہ ہائر ایجوکیشن کے عہدیداروں نے اس بات کا بھی انکشاف کیا ہے کہ UG-NEET کونسلنگ کی تکمیل کے بعد مزید کافی طلبہ میڈیکل کالجوں کا رُخ بھی کرنے کا امکان ہے۔
رپورٹ کے مطابق "تقریباً 30,000 طلباء نے UG-NEET کاؤنسلنگ کے لیے اندراج کیا ہے جن میں سے کم از کم 25,000 نے انجینئرنگ کی نشستیں حاصل کی ہیں۔ اگر ان میں سے بعض طلباء میڈیکل، ڈینٹل یا کوئی اور کورس کے لئے کاونسلنگ میں حصہ لیتے ہیں، تو انجینرنگ کی مزید سیٹیں خالی ہوسکتی ہیں۔ پتہ چلا ہے کہ اس سال ریاست کرناٹک کی انجینئرنگ کالجس میں کل 64,484 سیٹیں دستیاب کرائی گئیں تھیں جن میں سے 48,027 سیٹوں کا انتخاب کیا جاچکا ہے۔