پونے، 10؍اپریل (ایس او نیوز؍ایجنسی)  رائل چیلنجر س بنگلور ونے آئی پی ایل 2022 کے اٹھارہویں میچ میں ممبئی انڈینس کو 7 وکٹ سے شکست دی۔ رائل چیلنجرس بنگلورو (آر سی بی) کی موجودہ سیزن میں یہ تیسری جیت ہے جبکہ ممبئی انڈینس کو مسلسل چوتھی شکست کا سامنا کرنا پڑا ہے۔ ممبئی کی طرف سے رکھے گئے 152 رنوں کے ہدف کا پیچھا کرنے اتری بنگلورو کی ٹیم 18.3 اوور میں تین وکٹ کے نقصان پر جیت درج کرنے میں کامیاب رہی۔ آر سی بی کے چار میچوں میں تین جیت سے 6 پوائنٹ ہوگئے ہین اور وہ پوائنٹ ٹیبل میں تیسرے نمبر پر پہنچ گئی ہے جبکہ ممبئی کی ٹیم نویں نمبر پر ہے۔

ہدف کا تعاقب کرنے اتری رائل چیلنجرس بنگلورو کی ٹیم کو انوج راوت اور فاف ڈوپلیسی کی سلامی جوڑی نے نصف سنچری شروعات دلائی۔ دونوں نے پہلے وکٹ کے لئے 50 رن جوڑے۔ فاف ڈوپلیسی کو جے دیو انادکٹ کی گیند پر سوریہ کمار یادو نے کیچ کیا۔ آر سی بی کے کپتان نے 24 گیندوں پر ایک چوکے کی مدد سے 16 رن بنائے۔ بنگلورو کی 4 میچوں میں یہ تیسری جیت ہے۔

نوجوان سلامی بلے باز انوج راوت 47 گیندوں پر 66 رن بناکر ناٹ آوٹ ہوئے۔ انوج نے اپنی اس اننگ میں دو چوکے اور 6 چھکے لگائے۔ انہوں نے وراٹ کوہلی کے ساتھ مل کر دوسرے وکٹ کے لئے 80 رنوں کی شراکت کی۔ وراٹ کوہلی 36 گیندوں پر 48 رن بناکر آوٹ ہوئے۔ وراٹ کوہلی کو نوجوان بلے باز ڈیوالڈ بریوس نے ایل بی ڈبلیو آوٹ کیا۔

اس سے قبل سوریہ کمار یادو کی 37 گیندوں میں ناٹ آوٹ 68 رنوں کی اننگ کی بدولت ممبئی انڈینس نے درمیانی اووروں میں لڑکھڑانے کے بعد 6 وکٹ پر 151 رنوں کا چیلنجنگ اسکور کھڑا کیا۔ سوریہ کمار نے اپنی ناٹ آوٹ نصف سنچری اننگ میں پانچ چوکے اور 6 چھکے لگائے۔ انہوں نے خاص طور پر محمد سراج کے خلاف خوب رن بٹورے، جنہوں نے اپنے چار اوور کے کوٹے مین بغیر کسی کامیابی کے 51 رن لٹا دیئے۔