نئی دہلی، 8؍فروری (ایس او نیوز؍ایجنسی )  مالی سال 2022-23 کے لیے ریزرو بینک آف انڈیا کی آخری کریڈٹ پالیسی کے فیصلوں کا آج اعلان کیا گیا ہے۔ آر بی آئی کے گورنر شکتی کانت داس نے صبح 10 بجے سے ایم پی سی میٹنگ کے نتائج کے بارے میں جانکاری دی ہے اور اس میں ریپو ریٹ کا اعلان کیا ہے۔

آر بی آئی کے گورنر شکتی کانت داس نے کہا کہ عالمی معیشت میں اتار چڑھاؤ اور مہنگائی کے اعداد و شمار ہندوستانی معیشت پر بھی اثر انداز ہو رہے ہیں۔ ہندوستانی معیشت تیزی سے ترقی کر رہی ہے لیکن عالمی چیلنجز ہمارے سامنے ہیں اور اسی کے مطابق فیصلے کرنے ہوں گے۔ آر بی آئی کے گورنر نے کہا کہ مالی سال 2023 کے لیے ہندوستان کی جی ڈی پی کا تخمینہ 7 فیصد لگایا گیا ہے۔ مالی سال 2023-24 میں مہنگائی کی شرح 4 فیصد کی حد سے اوپر رہنے کا امکان ہے۔

ریزرو بینک آف انڈیا کے گورنر شکتی کانت داس نے اعلان کیا ہے کہ ایم پی سی نے ریپو ریٹ میں 0.25 فیصد اضافہ کیا ہے۔ اس کے بعد ملک میں ریپو ریٹ بڑھ کر 6.50 فیصد ہو گیا جو پہلے 6.25 فیصد تھا۔ ایم پی سی کے 6 میں سے 4 ارکان نے اس کے حق میں ووٹ دیا۔

ریزرو بینک کی مانیٹری پالیسی کمیٹی کی میٹنگ پیر 6 فروری کو ہوئی تھی اور آج 8 فروری کو اس کے فیصلوں کا اعلان کیا گیا ہے۔ یہ مالی سال 2022-23 کے لیے آخری کریڈٹ پالیسی ہے اور بجٹ کے فوراً بعد نافذ ہوئی ہے۔ آر بی آئی کے گورنر نے کہا کہ بینکنگ سسٹم میں کافی لیکویڈیٹی ہے اور آر بی آئی ملک میں اس پر گہری نظر رکھے ہوئے ہے۔