بھٹکل ۱۴ اپریل (ایس او نیوز) بھٹکل مسلم یوتھ  فیڈریشن کے زیر اہتمام   حال ہی میں منعقدہ پروکبڈی ٹورنامنٹ میں بہترین کھیل کا مظاہرہ پیش کرکے  پلئیر آف دی ٹورنامنٹ کا خطاب پانے والے رتن نائک کو کرناٹکا اسٹیٹ کبڈی ٹیم کےلئے منتخب کیا گیا ہے۔

ٹیم میں منتخب کرنےکے بعد انہیں ریاستی کبڈی ٹیم کے ساتھ اُترپردیش کے ایودھیا میں منعقد ہونے والے 68 ویں نیشنل سنئیر کبڈی ٹورنامنٹ میں کھیلنے  روانہ کیا گیا ہے۔

بھٹکل  ماون کوروے تلگوڈ کے رہنے والے رتن گنپتی نائک بھٹکل میں کٹے ویرا ٹیم کے ممبر ہیں۔ وہ پڑوسی ضلع جنوبی کینرا کے سولیا میں  نہرو میموریل کالج میں بی کام کررہے  ہیں، جس کے دوران  گذشتہ دو سالوں سے وہ پونیرے یوا پلٹن ٹیم کے بھی ممبر بنےہیں۔

بھٹکل میں فیڈریشن کے زیراہتمام  پروکبڈی ٹورنامنٹ میں انہوں نے   بھائی جان ٹیم کی نمائندگی کی تھی اور اپنی بہترین رائیڈنگ کی وجہ سے پورے ٹورنامنٹ میں شائقین کی توجہ اپنی جانب مبذول کرانے میں کامیابی حاصل کی تھی۔ ان کے بہترین پرفارمینس کو دیکھتےہوئے ٹورنامنٹ میں انہیں  پلئر آف دی ٹورنامنٹ کے خطاب سےنوازا گیا تھا۔

رتن کو ریاستی ٹیم میں شامل کئے جانے پر بھٹکل مسلم یوتھ فیڈریشن سمیت کئی دیگر اداروں کی جانب سے انہیں مبارکباد پیش کی گئی ہے اور  مستقبل میں مزید بہترین کھیل کا پرفارمینس پیش کرنے نیک خواہشات کا اظہار کیا گیا ہے۔