ہاویری،7؍جون (ایس او نیوز؍ایجنسی) ہاویری ضلع کے لنگداہلی موضع سے چوروں نے لنگداہلی رمبھاپوری ہیرے مٹھ کا دروازہ توڑ کر نادر کرسٹل شیولنگ چوری کرلی جس کے تعلق سے بتایا گیا ہے کہ جنوبی ہند میں سب سے بڑے کرسٹل شیولنگ کے طور پر اسے جانا جاتا ہے۔ چوری کی واردات پیر اور منگل کی درمیانی رات پیش آئی۔
ذرائع سے ملی اطلاع کے مطابق چوری شدہ شیولنگ کی لمبائی اورچوڑائی 13انچ ہے۔پتہ چلا ہے کہ مٹھ کے سوامی ویرابھدرا شیواچاریہ سوامی جب باہر گئے ہوئے تھے تو چوروں نے اس کا فائدہ اُٹھاتے ہوئے اس واردات کو انجام دیا۔ اطلاع ملتے ہی منگل صبح پولیس موقع پر پہنچی اور جانچ شروع کردی۔
ہلاگیری پولیس تھانہ میں اس ضمن میں شکایت درج کی گئی ہے۔
یہ مٹھ‘ ریاست میں یاترا کے مرکز کے طور پر مشہور ہے۔ مٹھ میں جملہ 1,001شیولنگ نصب ہیں۔ اس میں ملک بھر میں موجود12جیوترلنگا کی نقل بھی موجود ہے۔ مٹھ کے ستوتوں پر 18شکتی دیوتاؤں کی تصاویر ہیں۔
ویرابھدرا شیواچاریہ سوامی سرکاری ملازم ہیں اور اپنی پوری تنخواہ مٹھ کو عطیہ کردیتے ہیں۔ وہ ہاویری الیکٹرک سپلائی کمپنی (ہیسکام) اور مٹھ کے امور بحسن خوبی انجام دیتے ہیں۔