کاروار 23/جولائی (ایس او نیوز) کاروار کے کوڈی باغ میں ایک 6سالہ بچی کے ساتھ آبروریزی کا وحشیانہ معاملہ سامنے آیا ہے۔معلوم ہوا ہے کہ بچی کے ساتھ زبردستی منہ کالا کرنے والے نوجوان کا نام ونودبابنی نائک(36سال) ہے۔

 موصولہ رپورٹ کے مطابق ملزم ایک تعمیراتی مزدور ہے اور وہ بچی کے والدین کے ساتھ تعمیراتی کام کے لئے آتاتھا۔بچی کو اس کے والدین کام پر اپنے ساتھ لے گئے تھے ا۔بچی جب کھیل کودمیں مصروف تھی تو اسے مٹن کا سالن کھلانے کا لالچ دے کر ونود اپنے ساتھ گھر لے گیااوروہاں پر اس کے ساتھ جنسی فعل انجام دیا۔پھر جب شام تک بچی گھر واپس نہیں لوٹی تو اس کی ماں ونود کے گھر پہنچی۔ اس وقت بچی گھر کے ایک کونے میں خاموش کھڑی ہوئی تھی اورونود کے گھر والے کونکنی زبان میں ونود کو برابھلا کہہ رہے تھے۔بچی کی ماں نے سوچا کہ شاید ونود کے گھر والے اسے شراب نوشی کرنے پر ڈانٹ رہے ہونگے۔ اور وہ اپنی بچی کو اپنے گھر واپس لے گئی۔ 

 رات کے وقت جب بچی درد سے تڑپنے لگی تو ماں نے اس سے تفتیش کی۔ اس پر لڑکی نے ونود کے ذریعے کی گئی جنسی ہراسانی کی بات بتائی۔ بچی کی ماں نے فوری طور پر شہری پولیس تھانے میں شکایت درج کروائی اور بچی کو علاج کے لئے ضلع اسپتال میں داخل کیاگیا۔ پولیس نے شکایت درج کرنے کے بعد ونود کو پوکسو ایکٹ کے تحت گرفتار کرلیا ہے۔