ایڈی یورپا کو صرف سیاست سے دلچسپی ہے: رندیپ سرجے والا
بنگلورو،20؍ستمبر(ایس او نیوز) کرناٹک کی بی جے پی حکومت کورونامتاثرین کی تعداد میں بے تحاشہ اضافہ کے باوجود عوام کی مدد کرنے میں کوئی دلچسپی نہیں لے رہی ہے، بلکہ ایسے مرحلہ میں جبکہ ریاست میں کورونا متاثرین کی تعداد 5لاکھ سے متجاوز ہوچکی ہے، وزیراعلیٰ بی ایس ایڈی یورپا اپنی کابینہ میں توسیع اور ردوبدل کامسئلہ لے کر راجدھانی دہلی پہنچے ہوئے ہیں۔ یہ بات اے آئی سی سی جنرل سکریٹری انچارج کرناٹک رندیپ سرجے والا نے کہی ہے۔
انہوں نے ٹوئٹ کیا ہے کہ گزشتہ10دنوں کے دوران کرناٹک میں روزانہ تقریباً 10ہزار لوگ کورونا سے متاثر ہورہے ہیں۔لیکن ریاستی بی جے پی حکومت کو اس کی کوئی پروا نہیں۔انہوں نے کہا کہ ایسا لگتا ہے کہ کرناٹک میں کورونا وائرس کی دوسری لہر داخل ہوچکی ہے۔سرجے والا نے کہا کہ ریاست میں کورونا وائرس سے بدحال عوام کی مدد کرنے میں ایڈی یورپا حکومت مکمل طور پر ناکام ہوچکی ہے۔عوام کو راحت پہنچانے کی بجائے حکمران بی جے پی اپنے داخلی جھگڑوں میں الجھی ہوئی ہے۔کابینہ میں توسیع اور ردوبدل کوبی جے پی نے عوام کی مشکلوں پر فوقیت دی ہے۔
انہوں نے کہا کہ کورونا وائرس سے نپٹنے میں اپنی ناکامی کا کھلا ثبوت دیتے ہوئے اس حکومت نے پہلے ہی یہ واضح کردیا ہے کہ کورونا وائرس سے بچنے کے لئے اب حکومت کچھ نہیں کرسکے گی بلکہ سارا معاملہ خدا پر ہی چھوڑدینا چاہئے۔