رام نگرم سیلاب متاثرین کیلئے نئے کپڑوں کی اشد ضرورت
بنگلورو،3؍ستمبر (ایس او نیوز) رام نگرم میں حالیہ شدید بارش اور سیلاب کی وجہ سے تقریباً5ہزار مکانات متاثر ہوئے ہیں، جن میں 150کچے مکانات زمین بوس ہوگئے ہیں۔ اس علاقہ میں جمعیت علماء کرناٹک شاخ رام نگرم ضلع کی نگرانی میں راحتی کاموں کاسلسلہ جاری ہے۔
جمعیت علماء ہند، کرناٹک کے جنرل سکریٹری مفتی شمس الدین بجلی صاحب نے نمائندو ں کو بتایا کہ رام نگرم میں متاثرین کی حالت بہت خراب ہے۔ فی الحال متاثرہ مکانات سے کیچڑ صاف کرنے کاکام جمعیت علماء کرناٹک کی نگرانی اور مفتی طاہر قریشی صاحب صدر جمعیت علماء کرناٹک شاخ رام نگرم کی سرپرستی میں جاری ہے۔ متاثرین میں کھانا اور راشن کٹس تقسیم کئے جارہے ہیں۔انہوں نے بتایا کہ متاثرین کے لئے کپڑوں کی سخت ضرورت ہے۔کیونکہ متاثرین اپنے مکانات سے بدن پر پہنے ہوئے کپڑوں سے باہر نکلے تھے۔ جب کپڑوں کیلئے اپیل کی جاتی ہے تو لوگ پرانے کپڑے لا کر دیتے ہیں۔ ان پرانے کپڑوں کو لینے کیلئے متاثرین تیار نہیں، اس لئے نئے کپڑوں کا عطیہ دینا بہتر ہے۔
مفتی شمس الدین بجلی صاحب نے بتایا کہ کل جمعیت علماء کرناٹک کے صدر مفتی افتخار احمد صاحب قاسمی کی قیادت میں انہوں نے مولانا محمد زین العابدین اور دیگر ذمہ داروں کے ساتھ رام نگرم کا دورہ کیا۔رام نگرم کے درمیان بہنے والا ایک نالہ ابل کر اس کا پانی گھروں میں گھس گیا تھا۔ گھروں اور اس علاقہ میں اتنا کیچڑ ہے کہ کوئی گاڑی جا نہیں سکتی۔ہمارا وفد بھی پیدل متاثرہ گھروں تک پہنچا۔مفتی شمس الدین نے بتایا کہ جمعیت کے ساتھیوں نے متاثرین کیلئے نہایت ضروری سامان کی فہرست تیار کی ہے۔انہیں فوری کچن کا سامان چاہئے، کپڑے عورتوں، مردوں اور بچوں کے لئے، حصیریں، نہالیوں اور کمبلوں کی بھی زیادہ ضرورت ہے۔متاثرہ مکانات کے بجلی کے کنکشن بھی کٹ ہوگئے ہیں۔انہوں نے بتایا کہ حالانکہ مقامی حضرات بھی متاثرین کی مدد کررہے ہیں لیکن یہ کافی نہیں۔اس لئے جمعیت علماء کرناٹک نے متاثرین کی مدد کیلئے ریاست کے تمام مخیر حضرات سے اپیل کی ہے۔