بنگلورو،20؍مارچ(ایس او نیوز)کرناٹک اسمبلی کے سابق اسپیکر رمیش کمار نے وزیر اعلیٰ بی ایس ایڈی یورپا کو مشورہ دیا ہے کہ وہ اپنے خاندان کی محبت میں اندھے نہ ہوں بلکہ ریاست کی ترقی پر  زیادہ توجہ دیں۔انہوں نے کہا کہ وزیر اعلیٰ کو چاہئے کہ ان کے ارد گرد موجود لوگوں کی باتوں پر توجہ دینے کی بجائے ان کے دائر ے سے باہر نکلیں اورعوام کے مسائل پر توجہ دیں۔

ریاستی اسمبلی میں بجٹ پر بحث کے دوران انہوں نے وزیر اعلیٰ ایڈی یورپا کی طرف سے اپنے خاندان کو بڑھاوا دینے کی کوششوں کی سخت مذمت کی اور کہا کہ وزیر اعلیٰ کے عہدے پر جو بھی آتا ہے اس کے اطراف لوگوں کا ایک دائرہ بن جاتا ہے اور بدقسمتی کی بات یہ ہے کہ وزرائے اعلیٰ انہیں لوگوں کی سنتے ہیں اور دوسروں کو نظر انداز کرتے ہیں۔

رمیش کمار نے کہا کہ وزیر اعلیٰ ایڈی یورپا جدوجہد کے سیاسی پس منظر سے آگے بڑھے ہیں۔ شکاری پور سے انہوں نے اپنی جدوجہد کی شروعات کی اورایک اہم قائد کے مقام تک پہنچے ہیں۔ انہوں نے کہا کہ ریاست کے عوام کے لئے اگروہ کچھ بہتر کرنے کاارادہ رکھتے ہیں تو اپنے ارد گرد جمع ان موقع پرستوں کو دور کریں جو صرف اپنے فائدے کے لئے جمع ہو چکے ہیں۔

انہوں نے کہا کہ ہر ایک پر خاندان کی ذمہ داری ہو تی ہے اور اس کو پورا کرنا ہی پڑتا ہے لیکن اقتدار ملنے کے بعد عوام کے مسائل کو سلجھانے پر توجہ ہونی چاہئے نہ کہ اپنے خاندان کو پروان چڑھانے پر۔ رمیش کمار نے کہا کہ ایسا ہی مشورہ انہوں نے ماضی میں سدارامیا کو بھی دیا ہے۔