غیر ملکی دورے پر روانہ ہونے رمیش جارکی ہولی کی تیاری
بنگلورو،29/اپریل(ایس او نیوز) اسمبلی کی رکنیت سے استعفیٰ دینے کا اعلان کرکے سیاسی سرگرمی کے لئے ذمہ دار بننے والے سابق وزیر رمیش جارکی ہولی فی الحال خاموشی اختیار کئے ہوئے ہیں، بتایاجاتاہے کہ انہوں نے غیر ملکی دورے پر روانگی کی تیاری کرلی ہے۔ 23 اپریل کو جب لوک سبھا انتخابات کی پولنگ ہورہی تھی اسی وقت رمیش جا رکی ہولی نے اسمبلی کی رکنیت سے استعفیٰ دینے کا اعلان کیاتھا اور دوسرے ہی دن بنگلور پہنچ گئے تھے۔ بنگلور میں انہوں نے کہاتھاکہ ان کے تنہا استعفے سے کوئی فائدہ ہونے والا نہیں ہے، جس کے پیش نظر ہم خیال اراکین اسمبلی کے ساتھ اجتماعی طور پر استعفیٰ پیش کیا جائے گا۔جس پر ان کے بھائی ریاستی وزیر ستیش جارکی ہولی نے جواب دیتے ہوئے کہا تھاکہ مخلوط حکومت کو بچانے کی طاقت کانگریس اور جے ڈی ایس کو ہے۔اور حکومت کو گرانے کے لئے درکار اراکین رمیش کے ساتھ نہیں ہیں۔ جس کے بعد سے رمیش جارکی ہولی خاموشی اختیار کئے ہوئے ہیں، اب بتایا جارہا ہے کہ وہ دیڑھ ماہ کے لئے یوروپ کے دورے پر روانہ ہونے والے ہیں۔ آج ہبلی میں اس معاملے پر ردعمل ظاہر کرتے ہوئے سابق وزیر اعلیٰ سدرامیا نے کہا ہے کہ رمیش جارکی ہولی کو منانے کی کوششوں کاآغاز کردیاگیا ہے۔ مگر اب تک انہوں نے اپنا ارادہ تبدیل نہیں کیا ہے۔ اس کی کیاوجہ ہے وہ خود ہی بتاسکتے ہیں۔ رمیش جارکی ہولی کے بھروسے مخلوط حکومت کو گرانے کی کوششوں میں لگی بی جے پی بھی اب اس معاملے پر خاموشی اختیار کرلی ہے۔ پارٹی نے لوک سبھا انتخابات کے نتائج تک اس معاملے پر کسی بھی طرح کی بیان بازی نہ کرنے کا فیصلہ لیا ہے تو بی جے پی کے ریاستی صدر بی ایس یڈیورپا نے واضح کردیاہے کہ رمیش جارکی ہولی کو پارٹی میں شمولیت کی دعوت نہیں دی گئی ہے۔