بنگلورو،3؍جنوری(ایس او نیوز) ریاستی وزارت سے برطرفی کے بعد برگشتہ کانگریسیوں کی قیادت کو سنبھالنے کی کوشش بسیار کے بعد گھر لوٹنے والے سابق وزیررمیش جارکی ہولی نے آج بلگاوی میں آپریشن کمل کے ذریعے ریاستی حکومت کو نقصان پہنچانے کے لئے بی جے پی کا آلۂ کار بننے کی کوشش میں ناکامی کا سارا غصہ اخباری نمائندوں پر اتارا۔ تقریباً آٹھ دن لاپتہ رہنے کے بعد رمیش جارکی ہولی کل گوکاک لوٹ آئے۔

آج جب میڈیاکے بعض نمائندوں نے ان کے گھر پہنچ کر ان سے رابطہ کرنے یا بات کرنے کی کوشش کی تو ان پر رمیش جارکی ہولی برس پڑے۔ بتایاجاتاہے کہ آج صبح رمیش جارکی ہولی نے گوکاک مل کے میدان میں تقریباً آدھے گھنٹے تک بیڈ منٹن کھیلا ، اس دوران انہوں نے اپنے محافظوں کو ہدایت دے رکھی تھی کہ کسی اخباری نمائندے کو ان کے قریب آنے نہ دیا جائے۔ محافظوں نے جب میڈیا کو یہ بات بتائی تو میدان کی بجائے یہ لوگ رمیش کی رہائش گاہ پہنچے۔ جب رمیش گھر پہنچے تو میڈیا کے نمائندوں سے ان سے بات کرنے کی کوشش کی تو اس پر رمیش نے سخت برہمی کا اظہار کرتے ہوئے کہا کہ پتہ نہیں آپ لوگوں کو کونسی زبان سمجھ میں آتی ہے۔ ایسا لگتا ہے کہ ان لوگوں کو یہاں سے مار کر بھاگانا پڑے گا۔