کرناٹک کے وزیر رمیش جارکی ہولی کی مبینہ سیکس سی ڈی فاش; سیاسی حلقوں میں ہنگامے کے بعد دیناپڑا استعفیٰ
بنگلورو، 3؍ مارچ (ایس او نیوز ) کرناٹک کی سیاست میں بار بار ہلچل کا سبب بننے والے ریاستی وزیر برائے آبی وسائل رمیش جارکی ہولی کی منگل کے روز ایک مبینہ سیکس سی ڈی فاش ہونے کے بعد آج بدھ کو وزیر موصوف نے اپنے عہدہ سے استعفیٰ دے دیا ہے۔
اس سلسلہ میں وزیر موصوف کے خلاف شہر کے کبن پارک پولیس تھانے میں حقوق اطلاعات کا رکن دنیش کلہلی نے شکایت درج کروائی تھی اور پولیس نے ضابطہ کے خلاف اس معاملے میں کارروائی کا اعلان کیا تھا۔
رمیش جارکی ہولی پر الزام ہے کہ کے پی ٹی سی ایل میں ملازمت دلانے کا جھانسہ دے کر انہوں نے لڑکی کا جنسی استحصال کیا اور جب وہ اپنا وعدہ نبھا نہ سکے تو انہوں نے اسے نظر انداز کرنا شروع کر دیا جس کے بعد اس لڑکی نے رمیش جار کی ہولی کے ساتھ اس کے ساتھ کی گئی مبینہ سیکس کی سی ڈی کو حقوق اطلاعات کارکن کے حوالے کر دی جس کو انہوں نے فاش کرد یا۔
ریاستی کابینہ میں ایک طاقتور وزیر سمجھے جانے والے رمیش جا رکی ہولی کے متعلق اس قسم کی سی ڈی فاش ہونے کے بعد ریاستی سطح پر ہی نہیں بلکہ قومی سطح پر بی جے پی کو ہزیمت اٹھانی پڑ ی۔ سننے میں آیا ہے کہ بی جے پی اعلی کمان کی طرف سے اس معاملہ میں کافی سختی سے نوٹس لیا گیا اور وزیر اعلی بی ایس ایڈی یورپا سے کہا گیا کہ وہ جار کی ہولی سے استعفی لیں ۔ اس دوران کبن پارک پولیس تھانے میں شکایت درج کروانے کے بعد سماجی کارکن دنیش نے بتایا کہ گزشتہ روز متاثرہ لڑکی کے گھر والوں نے ان سے رابطہ کیا اور رمیش جارکی ہولی کی اس مبینہ حرکت کے بارے میں انہیں تفصیلات سے آگاہ کروایا اور سی ڈی ان کے حوالے کی۔
اس ضمن میں انہوں نے اپنے وکیل سے مشورہ کے بعد سی ڈی کو پولیس کے حوالے کرنے کا فیصلہ کیا۔ انہوں نے کہا کہ اس معاملہ کی جانچ کے سلسلہ میں پولیس کی طرف سے جو بھی تفصیلات طلب کی گئیں اس کے بارے میں انہوں نے پولیس کو معلومات فراہم کی ہیں۔ انہوں نے کہا کہ متاثرہ کے خاندان والوں کود همکیاں دی جا رہی ہیں جس کی وجہ سے وہ لوگ خوف کے سایہ میں جینے پر مجبور ہیں۔
انہوں نے کہا کہ آرٹی نگر کی ساکن اس متاثرہ لڑکی نے رمیش جارکی ہولی سے ایک دستاویزی فلم بنانے کے سلسلہ میں رجو ع کیا تھا اس مرحلہ میں انہوں نے اس لڑکی کو کے پی ٹی سی ایل میں ملازمت دلانے کا جھانسہ دےکر اپنے جال میں پھانس لیا اور اس کا جنسی استحصال کرتے رہے۔ جب جارکی ہولی نے اس لڑکی کو روزگار دلانے کا وعدہ فراموش کردیا اور اسے نظر انداز کرنے لگے تو اس نے مبینہ سی ڈی فاش کر دی ۔ دنیش کلہلی نے اس بات کو مسترد کردیا کہ اس سیکس سی ڈی کے فا ش ہونے کے پیچھے سیاسی دباؤ کارفرما ہے۔ دنیش نے سب سے پہلے اس ضمن میں شہر کے پولیس کمشنر کمل پنت سے رجوع کیا اور ان کی ہدایت پر انہوں نے کبن پارک پولیس تھانے پہنچ کر شکایت درج کروائی۔
بتایا جاتا ہے کہ شکایت درج کرتے ہوئے دنیش نے جو بیان دیا ہے، پولیس نے اسے مکمل طور پر ویڈیو ریکارڈ کیا ہے۔ اس دوران مرکزی وزیر برائے پارلیمانی امور پر ہلا جوشی نے جا رکی ہولی کی مبینہ سیکس سی ڈی پر سخت ردعمل ظاہر کرتے ہوئے کہا کہ بی جے پی ڈسپلن شناس سیاسی جماعت ہے اس پارٹی میں ایسی حرکتوں کو برداشت نہیں کیا جاسکتا ۔ انہوں نے کہا کہ اس معاملہ میں بی جے پی کی قیادت جلد ہی فیصلہ لے گی۔
ان الزامات کے گھیرے میں آنے والے وزیر رمیش جارکی ہولی نے دعوی کیا ہے کہ سی ڈی میں نظر آنے والا شخص وہ نہیں ہیں ۔ انہوں نے کہا کہ ایسی لڑکی سے انہوں نے ملاقات ہی نہیں کی جس کا مبینہ سی ڈی میں حوالہ دیا گیا ہے۔
مگر آج بدھ کو موصوف نے سیاسی حلقہ میں ہنگامہ کے چلتے وزیراعلیٰ یڈی یورپا کو اپنا استعفیٰ پیش کردیا۔