بنگلورو،3؍نومبر (ایس او نیوز) سینئر کانگریس رکن اسمبلی وسابق ریاستی وزیر رام لنگا ریڈی نے کہا کہ ان کی وزیر اعلیٰ بی ایس ایڈی یورپا سے ملاقات کو سیاسی رنگ نہ دیا جائے۔ انہوں نے حلقہ کی ترقی کے مقصد سے وزیر اعلیٰ سے ملاقات کی تھی۔ریڈی نے کہا کہ سیلاب زدہ علاقوں کے لئے معاوضہ جاری کرنے کے معاملے میں مرکزی حکومت نے ریاست کے ساتھ سوتیلا پن رویہ اپنایا ہوا ہے۔ڈالرس کالونی میں واقع وزیر اعلیٰ کی رہائش گاہ پہنچ کر ملاقات کرنے کے بعد انہو ں نے نامہ نگاروں کو بتایا کہ وزیر اعلیٰ سے ان کی ملاقات کو لے کر سیاسی رنگ نہ دیا جائے۔ ایک رکن اسمبلی کے طو رپر انہوں نے اپنے حلقہ کی ترقی کے مقصد سے وزیر اعلیٰ سے ملاقات کی گئی ہے۔ مرکزی حکومت کو نشانہ بناتے ہوئے رام لنگا ریڈی نے کہا کہ ریاست میں سیلاب زدہ علاقوں میں راحت کاری کو مؤثر طریقہ سے انجام دینے کے لئے مرکزی حکومت تعاون نہیں کررہی ہے۔ مرکز نے ریاست کے ساتھ سوتیلا سلوک جاری رکھا ہے۔ اس سے قبل ریاست میں مخلوط حکومت کے دور اقتدار کے دوران رام لنگاریڈی نے اسمبلی کی رکنیت استعفیٰ دے دیا تھا اور یہ باتیں ہونے لگی تھیں کہ وہ بی جے پی میں شمولیت اختیار کرلیں گے۔ لیکن کانگریس اعلیٰ قائدین کے مشورے کے بعد انہو ں نے اپنا استعفیٰ واپس لے لیا تھا۔آج اچانک رام لنگا ریڈی کی وزیر اعلیٰ سے ملاقات سے سیاسی حلقوں میں قیاس آرائیاں شروع ہوگئی ہیں۔لیکن ریڈی نے وضاحت کی کہ وزیر اعلیٰ سے ملاقات کے دوران کوئی سیاسی تبادلہ ئخیال نہیں ہوا۔ریاستی بی جے پی حکومت کے 100/ دن کے دوران اس کی کارکردگی صفر رہنے کے سدارامیا کے بیان پر ریڈی نے کہا کہ سدارامیا نے کارکردگی کا جائزہ لینے کے بعد ہی بیان دیا ہے۔ ریڈی نے بتایا کہ ان کا بی ٹی ایم لے آؤٹ اسمبلی حلقہ کافی بڑا ہے۔ اس حلقہ میں 8/ وارڈز شامل ہیں۔ حلقہ کی مجموعی ترقی کے لئے سابق حکومت نے ترقیاتی کام کے لئے 378/ کروڑ کا فنڈ مختص کیا تھا۔ بی جے پی حکومت برسراقتدار آنے کے بعد اس فنڈ میں کٹوتی کرکے 153/ کروڑ کردی ہے۔ انہو ں نے کہا کہ وزیر اعلیٰ سے ملاقات کے دوران فنڈ میں اضافہ کرنے کا مطالبہ کیا ہے۔ وزیر اعلیٰ نے انہیں یقین دلایا کہ فنڈ ضرور جاری کریں گے۔