راجستھان: بی جے پی کے خلاف سڑکوں پر اتری کانگریس، تمام اضلاع میں احتجاج
جے پور،25؍جولائی (ایس او نیوز؍ایجنسی) کانگریس نے بی جے پی کی طرف سے راجستھان میں سازش کر کے پیدا کئے گئے سیاسی بحران کے خلاف ہفتہ کے روز ریاست کے تمام اضلاع میں احتجاجی مظاہرہ کیا۔ رادھانی جے پور کے علاوہ جودھپور اور بیکانیر سمیت تمام اضلاع میں کانگریس کارکنان سڑکوں پر اترے اور بی جے پی کی سازشوں کے خلاف نعرےبازی کی۔ اسی اثنا میں وزیر اعلیٰ اشوک گہلوت نے ریاست کے گورنر سے ملاقات کے لئے وقت مانگا۔
کانگریس کے ریاستی صدر گووند ڈوٹاسرا نے اس سے پہلے کہا تھا کہ بی جے پی کی طرف سے راجستھان میں جمہوریت کے قتل کی سازش کے خلاف ہفتہ کے روز صبح 11 بجے تمام اضلاع میں کانگریس کارکنان کی جانب سے مظاہرہ کیا جائے گا اور دھرنا دیا جائے گا۔
راجستھان میں جاری سیاسی بحران کے درمیان کانگریس رہنما راہل گاندھی نے بی جے پی پر بڑا حملہ بولا ہے۔ انہوں نے کہاک ہ حکومتیں عوام کی اکثریت سے بنتی ہیں، گورنر کو اسمبلی اجلاس طلب کرنا چاہئے۔
راہل گاندھی نے #ArrogantBJP ہیش ٹیگ کے ساتھ ٹوئٹ کر کے کہا، ’’ملک میں آئین اور قانون کی بالادستی ہے۔ حکومتیں عوام کی اکثریت سے بنتی اور چلتی ہیں۔ راجستھان حکومت گرانے کی بی جے پی کی سازش صاف نظر آ رہی ہے۔ یہ راجستھان کے آٹھ کروڑ لوگوں کی بے عزتی ہے۔ گورنر کو اسمبلی اجلاس طلب کرنا چاہئے تاکہ سچائی ملک کے سامنے آ سکے۔‘‘