جئے پور،10؍اگست (ایس او نیوز؍ایجنسی) راجستھان کے اسکولوں کے ایک کروڑ طلبا جمعہ کو ایک ساتھ حب الوطنی سے سرشار نغمہ گا کر عالمی ریکارڈ بنا سکتے ہیں۔ محکمہ اسکولی تعلیم کے ایڈیشنل چیف سکریٹری پون کمار گویل کا کہنا ہے کہ آزادی کے امرت مہوتسو کے تحت طلبا میں حب الوطنی کا جذبہ جگانے کے لیے ریاست کے سبھی سرکاری اور غیر سرکاری اسکول 12 اگست کی صبح 10.15 بجے ایک ساتھ حب الوطنی والے نغمے گائیں گے۔

پون کمار گویل کا کہنا ہے کہ امرت مہوتسو مہم کے تحت منعقد پروگرام میں وزیر اعلیٰ اشوک گہلوت کے جئے پور واقع سوائی مان سنگھ اسٹیڈیم میں پہنچنے کا امکان ہے۔ ان کے علاوہ ضلع سطحی پروگرام میں مہمانِ خصوصی کی شکل میں متعلقہ ضلع انچارج وزیر بھی شامل ہو سکتے ہیں۔ انھوں نے مزید بتایا کہ حب الوطنی نغمہ کے پروگرام میں تقریباً ایک کروڑ اسکولی طلبا کے حصہ لینے کی تجویز ہے، جس سے عالمی ریکارڈ بننے کا امکان ہے۔ گویل نے بتایا کہ جہاں یومِ آزادی تقریب منعقد ہونے والے ہیں وہاں ضلع سطحی پروگرام منعقد کیے جائیں گے۔