کاروار : مانسون میں آئی تیزی - ساحلی علاقہ میں ہو رہی ہے مسلسل بارش - مختلف مقامات پر پانی جمع ہونے سے عام زندگی ہوئی متاثر
کاروار 22 / جون (ایس او نیوز) ساحلی علاقہ میں بالآخر مانسون نے تیزی پکڑ لی ہے اور پچھلے دو تین دنوں سے لگاتار بارش کا سلسلہ شروع ہوگیا ہے جس کی وجہ سے اپنے وقت پر مانسون شروع نہ ہونے سے فکرمند عام لوگوں اور کسانوں کو ذرا سا سکون ملا ہے ۔
مسلسل برسات کی وجہ سے کاروار شہر اور تعلقہ کے مختلف مقامات پر پانی جمع ہوا اور بعض جگہ یہ پانی رہائشی علاقوں میں گھس گیا جس سے عام لوگوں کو دشواریوں کا سامنا کرنا پڑا ۔ منگلورو پنجی ہائی وے پر فورلین توسیع کے لئے ٹھیکیدار کمپنی آئی آر بی کی طرف سے ادھورا کام کرنے اور بیچ سڑک پر مٹی کا ڈھیر رکھ چھوڑنے کی وجہ سے پانی نکاسی بند ہوگئی ۔ اس کے علاوہ گندے پانی کے نالے پر غیر قانونی قبضہ کرنے اور وہاں بھی مٹی اور کچرے کا ڈھیر جمع ہونے کی وجہ سے لندن برڈج کے پاس نالہ بھر کر ابلنے لگا ۔
ایم ایل اے روپالی نائک نے بعض جگہ پہنچ کر حالات کا معائنہ کیا اور آئی آر بی کمپنی اور نیشنل ہائی وے اتھاریٹی آف انڈیا کے ذمہ داروں کو وارننگ دی کہ دو دن کے اندر سڑک پر سے مٹی اور پتھروں کا ڈھیر ہٹایا جائے اور برساتی پانی کی نکاسی کا راستہ صاف کرکے دیا جائے ۔
اس کے علاوہ نئے ایکسٹنشن اور کالونیوں میں ہونے والی تعمیرات کے دوران برساتی پانی نکاسی کے جو راستے ہیں اس پر قبضہ اور اپنی اس پر عمارتیں تعمیر کرنے کی وجہ سے بھی برسات کے موسم میں رہائشی علاقوں میں سیلابی صورتحال پیدا ہونے کی بات سامنے آئی ہے ۔
اس کے لئے عوام بلدی افسران کو ذمہ قرار دے رہے ہیں کہ مانسون آنے سے پہلے پانی نکاسی نظام کو درست نہیں کیا جاتا اور پانی نکاسی کے راستوں پر قبضہ کرنے والوں کے خلاف کوئی کارروائی نہیں کی جاتی جس کی وجہ سے ہر سال اسی طرح تکلیف اور دشواریوں کا سامنا کرنا پڑتا ہے ۔
