بھٹکل 16 جون (ایس او نیوز) بھٹکل میں گذشتہ ایک ہفتہ سے جاری  موسلادھار بارش کے ساتھ ہی  بھٹکل کے کئی اندرونی علاقوں میں سڑکوں کی حالت بد سے بدتر ہوگئی ہے، بالخصوص جالی پٹن پنچایت حدود کے گڈلک روڈ،  کارگیدے، ہورلی سال  میں روڈ کی  حالت ایسی خستہ ہوگئی ہے کہ عوام کا راستوں پر سے چلنا دوبھر ہوگیا ہے۔   دراصل ان علاقوں میں اکثر جگہوں پر   انڈر گراونڈ ڈرینیج (یو جی ڈی)  کا پائپ  لائن  بچھانے کا کام جاری ہے جس کی وجہ سے بعض راستوں پر کھدائی ہوچکی ہے ، جبکہ کئی جگہوں پر  کھدائی  کرکے پائپ لائن بچھانے کا کام باقی ہے، ایسے میں جن جگہوں پر پائپ لائن بچھانے کے بعد  مٹی ڈال کر  گڈھوں کو بھردیا گیا ہے، بارش نے اُن جگہوں پر  عوام کا چلنا دوبھر کردیا ہے۔ ایسے میں اس بات کی بھی شکایتیں مل رہی ہیں کہ یو جی ڈی  کاکام ابھی مکمل نہیں  ہوا ہے  لیکن ابھی سے  یو جی ڈی کے چمبرس کے اندر بارش کا پانی جمع ہونا شروع ہوگیا ہے جس سے   آگے چل کر  کنوئوں کے اندر گندا پانی جمع ہونے کے آثار ابھی سے نظر آنے شروع ہوگئے ہیں۔ عوام اس بات کو لے کر خاصے پریشان ہیں کہ جب چمبرس کے اندر بارش کا پانی  جمع ہوسکتا ہے تو ظاہر بات ہے کہ   جب یو جی ڈی کا کام مکمل ہوگا  اور ان چمبرس کے ذریعے گندہ پانی نکلنا شروع ہوگا تو  تو  چمبرس سے  گندہ پانی سیدھے کنووں کے اندر  بھی داخل ہونا شروع ہوجائے گا۔

اس تعلق سے ساحل آن لائن سے گفتگو کرتے ہوئے   جالی پٹن پنچایت  کے اسٹینڈنگ کمیٹی کے چیرمین جناب بلال  قمری نے بتایا کہ   بارش کی وجہ سے  روڈ کی بدتر حالت  اور عوام کی پریشانیوں کو دیکھتے ہوئے انہوں نے فوری طور پر  یو جی ڈی کے کام کو روکنے کی ہدایت دی ہے، جبکہ فوری طور پر روڈ کو درست کرنے کی طرف توجہ دی جارہی ہے، ا نہوں نے  کہا کہ جمعرات کو پہلی فرصت میں  سڑک کنارے پائے جانے والے کچروں اور مٹی کے ڈھیر کو ہٹایا جائے گا جس کے بعد عارضی طور پر وہاں مٹی ڈال کر  سڑک کو درست کیا جائےگا۔  انہوں نے  یقین دلایا کہ یو جی ڈی کا کام مکمل ہونے کے بعد اگر کہیں پر تار روڈ (دامبر روڈ)   پر کھدائی کی گئی ہے تو وہاں  تار  بچھاکر ہی  سڑک کی مرمت کی جائے گی، جہاں کانکریٹ روڈ توڑا گیا   ہوگا، وہاں کانکریٹ  کی مدد سے ہی روڈ کی درستگی کی جائے گی۔

بلال صاحب نے بتایا کہ چمبرس کے اندر سے  بارش کا پانی  رسائو  ہونے کی شکایات موصول ہوئی  ہیں، جس کو دیکھتے ہوئے  کاروار کے یو جی ڈی انجینر  ششی دھر ہیگڈے کو شکایت کی گئی ہے، توقع ہے کہ وہ  جمعرات کو بھٹکل پہنچیں گے ، انہوں نے یقین دلایا کہ  جن جن چمبروں  میں پانی  اوور فلو ہورہا ہےا ور جن چمبروں کے اندر پانی کا رساو ہورہا ہے، اُن سبھی چمبروں کی مرمت جب تک نہیں کی جائے گی، یو جی ڈی کے کام کو آگے نہیں بڑھایا جائے گا۔