بھٹکل میں طوفانی بارش جاری؛ فاروقی اسٹریٹ کی عارضی عبادت خانہ کی چھت بیٹھ گئی؛ شرالی میں ہائی وے پر پانی جمع
بھٹکل 13/جون (ایس او نیوز) شہر میں کل دوپہر سے شروع ہوئی بارش رات کو مزید تیز ہوگئی، جس کے نتیجے میں بعض جگہوں سے نقصانات کی بھی خبریں موصول ہوئی ہیں۔
ذرائع نے بتایا کہ طوفانی بارش کے نتیجے میں شہر کی قدیم فاروقی مسجد کے متصل عارضی عبادت خانہ کی چھت رات کے کسی پہر میں بیٹھ گئی، جس سے لوگوں کو فجر کی نماز پڑھنے میں دشواری پیش آئی۔ بتایا گیا ہے کہ مسجد کا تعمیراتی کام جاری ہونے کی وجہ سے قریب میں واقع ایک کمپاونڈ میں عارضی شیڈ ڈال کر نماز ادا کی جارہی تھی، رات کو طوفانی بارش کے چلتے پوری چھت بیٹھ گئی، فوری طور پر مسجد کے ذمہ داران نے جائے وقوع پر پہنچ کر شیڈ کو دوبارہ ترتیب دینا شروع کردیا ہے۔
رات کو ہوئی طوفانی بارش کے نتیجے میں تعلقہ کے ایک انگن واڑی اسکول کی چھت پر درخت گرنے کی بھی اطلاع موصول ہوئی ہے۔ اسی طرح بھاری بارش کے نتیجے میں شرالی نیشنل ہائی وے پر کثیر مقدار میں پانی جمع ہوجانے سے سواریوں کے گذرنے پر فوارے کا نظارہ دیکھا گیا ہے۔
محکمہ موسمیات کے مطابق کل بدھ صبح آٹھ بجے سے آج جمعرات صبح آٹھ بجے تک بھٹکل تعلقہ میں 64.24 ملی میٹر بارش ریکارڈ کی گئی ہے۔
بھٹکل میں آج صبح سے اسمان آبر آلود ہے ، شام کا سماں لگ رہا ہے اور وقفے وقفے سے بارش بھی ہورہی ہے، مگر گذشتہ سالوں کے مقابلے میں اس بار بارش کافی کم ہے۔