زوردار بارش کے نتیجے میں مینگلور میں ایک کمپاونڈ کی دیوار گرگئی؛ دو بچے جاں بحق
مینگلور 8/ستمبر (ایس او نیوز) گذشتہ کئی دنوں سے جاری موسلادھار بارش کے دوران شہر کے پڈیل میں واقع ایک مکان کے اطراف تعمیر شدہ کمپاونڈ کی دیوار مکان کے اوپر ہی گرگئی جس کے نتیجے میں مکان کے ایک کمرے کے اندر پڑھائی کرنے والے دو بچے جائے وقوع پر ہی جاں بحق ہوگئے۔ دل کو دہلادینے والی یہ واردات اتوار کی شام قریب آٹھ بجے پیش آئی ۔
مرنے والے بچوں کی شناخت نو سالہ ورشنی اور سات سالہ ویدانتھی کی حیثیت سے کی گئی ہے، ورشنی چوتھی کلاس اور ویدانتھی دوم کلاس میں قریبی اسکول میں پڑھ رہے تھے، بتایا گیا ہے کہ9/ستمبر کو ہونے والے امتحان کی تیاری میں دونوں مصروف تھے جس کے دوران کمپاونڈ کی قریب بیس فٹ اونچی دیوار گھر کے کمرے کی دیوار پر گرگئی اور گھر کے کمرے کی دیوار ان دونوں بچوں پر گرگئی۔ جس وقت یہ حادثہ ہوا، والد رامچندرا اور والدہ رجنی دونوں گھر کے باہر تھے، دیوار گرتے ہی والدین نے دونوں کے اوپر سے فوری طور پر پتھروں کو ہٹایا اور اُنہیں باہر نکال کر قریبی اسپتال لے گئے، مگر اُس وقت تک دونوں دم توڑ چکے تھے۔
واقعے کی اطلاع ملتے ہی کنکناڈی پولس موقع پر پہنچ گئی، مزید چھان بین کی جارہی ہے۔
