بھٹکل ،9 ؍ اگست (ایس او نیوز) بھٹکل تعلقہ کے مختلف علاقوں میں پچھلے دنوں شدید بارش کے بعد جو سیلابی کیفیت پیدا ہوئی تھی اس دوران جن گھروں میں پانی گھس آیا تھا ان میں سے کئی لوگوں کا کہنا ہے کہ ان کے ساز و سامان کے علاوہ کئی اہم دستاویزات بھی  پانی میں بھیگ کر خراب ہوگئے ہیں جس کی وجہ سے انہیں بڑی دشواریوں کا سامنا ہو سکتا ہے ۔
    
متاثرین میں کئی لوگوں نے کہا ہے کہ اسکول اور کالجوں کے سرٹی  فیکٹیس ، ایوارڈس کی سندیں ، زمین کی خریداری کے اگریمنٹس، پاور آف اٹارنی کے کاغذات ، خرید و فروخت کے سلسلے میں دئے بیعانہ (ایڈوانس رقم) کے کاغذات، اتی کرم سے متعلق جمع کروائی گئی درخواستوں کی نقلیں اور دستاویزات اور دیگر مختلف اہم دستاویزات بھیگ کر برباد ہوگئے ہیں ۔ اگر سرکاری افسران کی طرف سے تعاون نہیں ملا اور جلد از جلد ان کی مصدقہ نقلیں فراہم نہیں کی گئیں تو ان کے لئے بہت سی مشکلات پیش آ سکتی ہیں ۔ 
    
متاثرین نے سرکاری افسران اور منتخب عوامی نمائندوں سے درخواست کی ہے کہ برسات اور سیلاب سے متاثرین کو درپیش اس طرح کی مشکلات کا بھی حل نکالنے کی طرف فوری توجہ دیں ۔