بھٹکل:14؍اگست (ایس اؤ نیوز)تعلقہ بھر میں بدھ کے روز رک رک کر ہورہی بارش سے عوام گھروں میں ہی رہے، شہر اور مین روڈ پر زیادہ ہلچل نظر نہیں آئی۔
تعلقہ کی اکثر سڑکیں خستہ ہوکر کیچڑہونے کی وجہ سے راہ گیروں سمیت سواروں کو بھی دقت پیش آرہی ہے۔ بس اسٹانڈ کے سامنے والے گڑھے حسب معمول تالاب کی شکل اختیار کرنے سے مسافر وں کو مشکلات کا سامنا رہا۔ پچھلے 15دنوں سے برستی بارش کی وجہ سے عوام کو سورج دیکھنا نصیب نہیں ہواہے۔ تعلقہ کی زرعی زمین زیادہ ترپانی میں ڈوبی رہنے سے کسان پریشان ہیں اور پانی کے بہاؤ کے انتظارمیں ہیں۔ البتہ سمندر میں کچھ حد تک خاموشی کودیکھتے ہوئے ماہی گیر وں نے اطمینان کی سانس لی ہے۔ تعلقہ میں منگل کی صبح 8بجے سے بدھ کی صبح 8بجے 65ملی میٹر بارش ہوئی ہے۔ ابھی تک بارش کا کل پیمانہ 3187.4ملی میٹر بتایا گیا ہے۔