بھٹکل 14/جون (ایس او نیوز) بھٹکل میں بارش کا سلسلہ آج جمعہ کو بھی جاری ہے، البتہ وقفے وقفے کے بعد  بارش ہورہی ہے۔ مگر جمعرات کی شب  کو شہر اور مضافات میں طوفانی ہواوں کے ساتھ زبردست بارش ہوئی ہے جس کے نتیجے میں کئی علاقوں میں  بجلی  کے کھمبوں پر  درخت اور درختوں کی شاخیں گرنے سے الیکٹرک کھمبے  گرنے کی وارداتیں پیش آئی ہیں ۔

ہیسکام اسسٹنٹ انجینر منجوناتھ نے بتایا کہ جمعرات شب سے لے کر جمعہ کی صبح تک  بھٹکل کے مضافاتی علاقوں میں جملہ 16 الیکٹرک کھمبوں کو نقصان پہنچا ہے  جس میں  سے  بیلکے کے گنجے کیری میں 110KV بجلی  کا کھمبا گرنے سے  شدید نقصان پہنچا ہے۔ اسی طرح  ہیرور اور ہنومان نگر میں دو، دو الیکٹرک کھمبے مکمل طور پر ٹوٹ گئے ہیں  انہوں نے بتایا کہ  دیگر مضافاتی علاقوں میں  الیکٹرک کھمبوں کو نقصان پہنچا ہے۔ انہوں نے   گذشتہ 24 گھنٹوں میں  16 کھمبوں کو   نقصان پہنچنے کی وجہ سے   محکمہ کو  10 لاکھ سے زائد کا نقصان ہونے کی بات کہی ہے۔

بھٹکل میں جمعرات کو پوری رات اچھی بارش ریکارڈ کی گئی تھی مگر صبح بارش کا تسلسل ٹوٹ گیا اور وقفے وقفے سے بارش  ہوئی۔ مگر آسمان  آبرآلود رہا۔

محکمہ موسمیات کے مطابق  جمعرات صبح آٹھ بجے سے جمعہ صبح آٹھ بجے تک  بھٹکل میں 71.4 ایم ایم بارش ریکارڈ کی گئی ہے۔