نئی دہلی ، 15 اپریل(ایس او نیوز؍آئی این ایس انڈیا) بھارتیہ جنتا پارٹی (بی جے پی) نے پیر کو کہا کہ سپریم کورٹ نے رافیل سودے پر راہل گاندھی کے جھوٹ کو بے نقاب کر دیا ہے۔پارٹی نے دعوی کیا کہ لوگ چاہتے ہیں کہ کانگریس صدر وزیر اعظم نریندر مودی کی شبیہ خراب کرنے کے لئے معافی مانگے۔سپریم کورٹ نے آج واضح کیا کہ رافیل سودے پر اس فیصلے کے بارے میں راہل گاندھی کی طرف سے کئے گئے تبصرے غلط طریقے سے عدالت عظمی کی طرف منسوب کئے گئے ہیں۔اس کے بعد مرکزی وزیر اور بی جے پی لیڈر پرکاش جاوڈیکر نے پریس کانفرنس میں گاندھی پر نشانہ لگایا۔سپریم کورٹ بھاجپا ایم پی میناکشی لیکھی کی جانب سے گاندھی کے خلاف دائر توہین عرضی پر سماعت کر رہا تھا۔یہ عرضی ان خبروں کی بنیاد پر دائر کی گئی تھی جن کے مطابق کانگریس صدر نے مبینہ طور پر کہا تھا کہ عدالت عظمی نے اعتراف کیا ہے کہ رافیل لڑاکا طیارے سودے میں بدعنوانی ہوئی ہے اور مودی نے صنعتکار انیل امبانی کو 30000 کروڑ روپے دئے۔جاوڈیکر نے کہاکہ سپریم کورٹ نے گاندھی کے جھوٹ کو بے نقاب کر دیا ہے،وہ روزانہ جھوٹ بولتے ہیں اور ان میں سے ایک جھوٹ کو بے نقاب ہو گیا۔لوگو ں کا مطالبہ ہے کہ وہ معافی مانگے۔انہوں نے گاندھی پر مودی اور اداروں کی تصویر خراب کرنے کے لئے عدالت کا استعمال کرنے کا الزام لگایا اور کہا کہ گاندھی خاندان اس کو قبول نہیں کر پا رہا ہے کہ مودی ایسی ایماندار حکومت چلا سکتے ہیں جبکہ یو پی اے حکومت گھوٹالوں میں ڈوبی ہوئی تھی۔مرکزی وزیربرائے فروغ انسانی وسائل نے کہا کہ گاندھی سیاست کی سطح سب سے کم سطح پر لے جانے کے لئے ذمہ دار ہیں۔بی جے پی لیڈر نے کانگریس صدر کا مذاق اڑاتے ہوئے کہا کہ لوگوں کو پہلے ایسا لگتا تھا کہ وہ اپنی کم سمجھ کی وجہ سے غلط بیان دیتے ہیں لیکن اب یہ صاف ہو گیا ہے کہ وہ جان بوجھ کر ایسی غلطیاں کرتے ہیں۔