راہل گاندھی کی 18مارچ کو بنگلورومیں آئی ٹی پروفیشنلس سے ملاقات
بنگلورو،17؍مارچ(ایس او نیوز؍ یواین آئی) انفارمیشن ، کمیونکیشن اور ٹکنالوجی کے شعبہ میں خدمات انجام دینے والے پیشہ وروں کی نبض جاننے کی کوشش کے طورپر صدر کانگریس راہل گاندھی پیر کو کرناٹک کے دورہ کے دوران شہر کے آئی ٹی پیشہ وروں کے ساتھ تبادلہ خیال کے سیشن میں شرکت کریں گے ۔
پارٹی ذرائع نے بتایاکہ راہل گاندھی جو صبح میں گلبرگہ میں جلسہ سے خطاب کریں گے ، شام میں ریاستی دارالحکومت میں منتخب آئی ٹی پیشہ وروں سے تبادلہ خیال کریں گے ۔کرناٹک پردیش کانگریس کے آئی ٹی شعبہ نے آئی ٹی کے پیشہ وروں کے ساتھ پارٹی سربراہ کے تبادلہ خیال کا انتظام کیاہے جہاں راہل گاندھی نوجوان آئی ٹی ورکرس کے سوالات کا جواب دیں گے ۔اس تبادلہ خیال کے سیشن کو اہمیت حاصل ہوگئی ہے کیونکہ اطلاعات کے مطابق ملک میں این ڈی اے کی حکمرانی کے دوران ملازمتوں کی کمی ہوگئی ہے ۔ہاویری میں ان کے قبل ازیں دورہ کے دوران کرناٹک پردیش کانگریس نے ہبلی میں دانشوروں اور مصنفین کے ساتھ ان کے تبادلہ خیال کا انتظام کیا تھاجہاں انہوں نے کنڑا میڈیم سے متعلق مسائل اور نئی ملازمتوں کو پیداکرنے سے متعلق اہم امورکا سامنا کیا تھا۔ کانگریس کے سینئر لیڈران بشمول نائب وزیراعلیٰ جی پرمیشور،سابق وزیر اعلیٰ سدارامیا ، کرناٹک پردیش کانگریس کے صدر دنیش گنڈو راؤ اور پارٹی کے دیگر لیڈران بھی اس سیشن میں موجود ہوں گے ۔
