بیدر میں راہول گاندھی نے اُڑائی مرکزی سرکار کی دھجیاں؛ پارلیمانی انتخابات میں جیت درج کرنے پر جی ایس ٹی کو رد کرنے کا اعلان
بیدر،14اگست(ایس او نیوز) وزیر اعظم مودی کی قیادت میں چل رہی مرکزی سرکار کی کارکردگی کی دھجیاں اڑاتے ہوئے کانگریس پارٹی کے صدر راہل گاندھی نے کہا کہ آئندہ پارلیمانی انتخابات میں اگر کانگریس اقتدار پر آتی ہے تو وہ جی ایس ٹی (گوڈس اینڈ سروس ٹیکس) کو ختم کر دے گی۔ اور اس کی جگہ پر سی ایس ٹی (یکساں طریقہ کا سنگل سلیب ٹیکس) لاگو کیا جائےگا۔ اسی کے ساتھ راہل گاندھی نے پھر ایک بار موجودہ جی ایس ٹی کو "گبر سنگھ ٹیکس" قرار دیا اور کہا کہ گبر سنگھ نے چھوٹے بیوپاریوں کا جینا دوبھر کردیا ہے۔خیال رہے کہ گبر سنگھ مشہور فلم شعلے میں ایک خطرناک ڈاکو کا نام تھا !
راہول گاندھی نے کہا کہ اگر وزیر اعظم میں دم ہے تو وہ ان کے ساتھ ریفائل گھوٹالے پر بات کریں۔ انہوں نے کہا کہ ’’انل امبانی کی کمپنی نے کبھی ہوائی جہاز نہیں بنایا۔ جس کمپنی کو نریندر مودی نے ٹھیکہ دلوایا وہ 10دن پہلے بنائی گئی تھی۔‘‘ انہوں نے مزید کہا کہ ’’یہ ساری باتیں میں نے لوک سبھا میں پی ایم مودی کے سامنے کہیں۔ میں نے بتایا کہ کس طرح مرکزی وزیر دفاع نرملا سیتارمن نے جھوٹ بولا کہ ہوائی جہاز کی قیمت بتائی نہیں جا سکتی، کیونکہ یہ ایک خفیہ معاہدہ ہوا ہے۔ لیکن جب میں نے فرانس کے صدر سے ایسے کسی سمجھوتے کے بارے میں پوچھا تو انھوں نے ایسے کسی سمجھوتے سے انکار کردیا۔‘‘
کسان ریلی سے خطاب کرتے ہوئے راہول گاندھی نے کہا کہ مودی حکومت نے دو کروڑ نوجوانوں کو روزگار دینے کا وعدہ کیا تھا لیکن ان کا یہ وعدہ جملہ بن کر رہ گیا۔ راہل گاندھی نے مزید کہا کہ ’’ان کا وعدہ تو پورا نہیں ہوا لیکن اب وہ نوجوانوں کو پکوڑے بنانے کے لیے کہہ رہے ہیں۔ ساتھ ہی یہ بھی کہہ رہے ہیں کہ ہم آپ کو گیس نہیں دیں گے، گیس بھی آپ کو نالے سے نکال کر کوکر میں ڈالنی پڑے گی۔‘‘
کانگریس صدر نے اپنی تقریر کے دوران کہا کہ مودی صرف وعدے کرنا جانتے ہیں، نبھانا نہیں جانتے، ہم نے کرناٹک میں انتخابات کے دوران جو وعدہ کیا تھا، ہم نے نبھا کر دکھایا۔ راہول نے کہا کہ ہم نے کہا تھا کہ جیسے ہی کرناٹک میں کانگریس کی حکومت آئے گی، ہمارا پہلا کام کسانوں کا قرض معاف کرنا ہوگا، اور ہم نے ایسا کر کے دکھایا۔ لیکن نریندر مودی جی کسانوں کا قرض معاف نہیں کر سکتے۔ بڑی بڑی تقریریں کریں گے لیکن کام کی بات نہیں کریں گے۔
راہول نے مودی جی کو چیلنج کیا کہ کرناٹک کی حکومت نے کسانوں کا جتنا قرض معاف کیا ہے وہ اس کا نصف قرض ہندوستان کے کسانوں کا معاف کر کے دکھا دیں۔‘‘
یو پی اور بہار میں حال ہی میں پیش آئے عصمت دری کے واقعات پر بھی کانگریس صدر نے سوال اٹھائے۔ انھوں نے کہا کہ ’’نریندر مودی جی ایک نیا نعرہ لائے تھے کہ ’بیٹی بچاؤ، بیٹی پڑھاؤ‘ لیکن یہ نہیں بتایا تھا کہ بیٹی کو کس سے بچانا ہے۔ یو پی میں عصمت دری ہوئی اور بی جے پی رکن اسمبلی پر الزام لگا۔ لیکن پی ایم مودی نے بہار اور یو پی عصمت دری کے واقعات پر ایک لفظ بھی نہیں کہا۔
کیا راہول گاندھی بیدر سے چنائو لڑیں گے ؟ : بیدر سے پارلیمانی انتخابات کی کرناٹک میں سرگرمیوں کےآغاز کے موقع پر یہ بات سامنے آئی ہے کہ بیدر پارلیمانی حلقہ سے راہل گاندھی انتخابات لڑسکتے ہیں ۔ذرائع کے بموجب کے پی سی سی کے صدر دنیش گنڈوراؤ اورکرناٹک کے پارٹی انچارج کے سی وینوگوپال کے درمیان اس موضوع پر بات چیت ہوئی ہے۔
من کی بات سے غریبوں کا پیٹ نہیں بھرے گا:سدارامیا: اس ریلی سے خطاب کرتے ہوئے سابق ریاستی وزیر اعلیٰ سدارامیا نے کہاکہ وزیراعظم نریندرمودی کے دور اقتدار میں ملک کی ترقی نہیں بلکہ بدعنوانی کو فروغ ملا ہے ۔مودی پر حملہ کرتے ہوئے سابق وزیراعلیٰ نے کہاکہ مرکزمیں بی جے پی حکومت کے پچھلے 4سالوں کے دوران غیرملکی سرمایہ کاری کا فیصد صفر ہے ۔ مودی حکومت ہر محاذ پر بری طرح ناکام رہی ہے۔ جھوٹے وعدے اور جھوٹی تشہیر کے ذریعہ مرکز میں اقتدار حاصل کرنے والی بی جے پی حکومت نے عوام کے اعتماد کا خون کیا ہے ۔ انہوں نے کہاکہ نریندرمودی اس ملک کے چوکیدار نہیں ،بدعنوانی میں حصہ دار ہیں ۔انہیں کی بدولت ملک میں بدعنوانی عروج پر پہنچی ہے ۔جھوٹے وعدوں کے ذریعہ اقتدار پر آنے والے مودی کو اگلے لوک سبھا انتخابات میں اس ملک کی عوام ضرور سبق سکھائے گی۔ اگلے انتخابات میں کانگریس کو اکثریت حاصل ہوگی اورراہل گاندھی اس ملک کے وزیراعظم بنیں گے ۔وزیراعظم من کی بات سے غریبوں کا پیٹ بھر نہیں سکتے ۔انہیں کام کی بات کرنی چاہئے۔