نئی دہلی، 25 مئی(ایس او نیوز/آئی این ایس انڈیا) انتخابات کے نتائج میں کراری شکست ملنے کے بعد کانگریس صدر راہل گاندھی میڈیا کے سامنے اپنا استعفی پیش کرنا چاہتے تھے لیکن ماں سونیا گاندھی نے راہل گاندھی کو ایسا قدم اٹھانے سے روکا۔ذرائع سے ملی معلومات کے مطابق پریس کانفرنس کے بعد راہل گاندھی نے سونیا گاندھی سے بات چیت کی اور استعفیٰ کی بات رکھی لیکن یو پی اے صدر نے انہیں سمجھاتے ہوئے میڈیا کے سامنے استعفیٰ دینے سے منع کیا اور سی ڈبلیوسی میٹنگ کی بات کہی۔ملی معلومات کے مطابق راہل گاندھی اب سی ڈبلیوسی میٹنگ میں اپنا استعفیٰ پیش کریں گے،اگرچہ یہ دیکھنا انتہائی دلچسپ ہوگا کہ سی ڈبلیوسی کی میٹنگ میں ان کے استعفیٰ کاکیا ہوگا۔قابل ذکر ہے کہ انتخابات میں کانگریس کی خراب کارکردگی کا جائزہ لینے کے لیے ہفتے کے روز 25 مئی کو سی ڈبلیوسی کی میٹنگ ہوگی۔اس میٹنگ میں الیکشن کمیشن کی طرف سے جاری اعداد وشمار پر بات ہوگی۔بتا دیں کہ 16 ریاستوں اورمرکزکے زیرانتظام ریاستوں میں کانگریس کا کھاتہ نہیں کھلا اور تو اور پارٹی محض 50 سیٹوں پر سمٹ کر رہ گئی۔