بنگلورو19؍جنوری (ایس او  نیوز)کے پی سی سی تشہیری کمیٹی کے صدر ایچ کے پاٹل نے کہا ہے کہ راہل گاندھی کو وزیراعظم بنانا ہو تو ریاست سے کانگریس کے کم از کم 22اراکین پارلیمان کو جیتنا لازمی ہے ۔

انہوں نے کہا کہ دستیاب موقع کا بہتر استعمال کرتے ہوئے پارٹی کی ترقی کیلئے وہ کام کریں گے ۔ انہوں نے کہا کہ کسانوں کاقرضہ معاف نہ کرکے صنعت کاروں کی جانب سے بینکوں کو لوٹنے کی اجازت دینے والی بی جے پی کو مناسب سبق سکھانے کا اب وقت آگیا ہے۔ بی جے پی اور مودی حکومت کا زوال دوریاستوں سے شروع ہوگیا ہے ۔

انہوں نے کہا کہ 60سالوں میں کانگریس کی جانب سے ملک کو کچھ نہ دےئے جانے والی بات صرف بیوقوف اور آگاہی نہ رکھنے والے ہی کرتے ہیں ۔ بھارت کی آزادی کی تحریک کی تاریخ جاننے والا کوئی بھی شخص کانگریس کے تعلق سے غلط بات نہیں کرے گا۔انہوں نے کہا کہ کانگریس مکت بھارت کی بات کرنے والے اب ختم ہورہے ہیں ۔ ملک کو آزادی دلانے میں کانگریس کا بے حد اہم رول ہے ۔ آزادی کی جدوجہد میں لاٹھی کی مار کھانے کے موقع پر بھارت ماتا کی جئے کانگریس والے کہہ رہے تھے ۔ لیکن بی جے پی لیڈر اب ملک سے محبت کا سبق دینے چلے ہیں۔ بی جے پی کے ایسے مشورے کی ضرورت نہیں ہے ۔ اس سے غریبوں کا پیٹ نہیں بھرتا ۔

انہوں نے کہا کہ ملک کی ترقی کیلئے کانگریس کی بہت زیادہ حصہ داری ہے ۔ غریبی کی سطح پر موجود 30کروڑ لوگوں کو درمیانی طبقے تک لانے کا اعزاز کانگریس کو جاتاہے۔ ہم نے 78لاکھ ملازمتیں تخلیق کی تھیں۔ بی جے پی لیڈروں کی جانب سے 12لاکھ ملازمتیں تخلیق نہیں کی جاسکیں۔