پتور،24؍مئی (ایس او نیوز) نیشنل ہائی وے کی فورلین توسیع کے دوران غیر معیاری کام کی وجہ سے دو بھاری کنٹینر ٹرکس روڈ سائڈ گڈھے میں پھنس گئے جس کے بعد اپن انگڈی میں کارویل کے پاس نیشنل ہائی وے پر 3 گھنٹے تک ٹریفک جام لگا رہا ۔ اس ٹریفک جام کی وجہ سے بچوں کو اسکول لے جانے والی گاڑیوں اور دیگر سواریوں کو بڑی مشکلات کا سمانا کرنا پڑا-
بتایا جاتا ہے کہ شاہراہ کی توسیع کے لئے مزدروں نے سڑک کے بازو میں نالا بنانے کے لئے زمین کی کھدائی کی تھی اور وہاں سے کیچڑ اور مٹی نہیں ہٹائی گئی تھی ۔ بارش کی وجہ سے یہ مٹی کیچڑ کی شکل میں واپس نالے میں جمع ہوگیا اور نالا زمین کے برابر ہوگیا ۔ اسی دوران ایک کنٹرینر ڈرائیور نے دوسری گاڑی کو راستہ دینے کی کوشش کی تو اس کے ٹرک کا ٹائر کیچڑ بھرے نالے میں پھنس گیا ۔ پھر تھوڑی ہی دیر میں دوسرے کنٹینر نے اسی طرف سے نکلنے کی کوشش کی تو اس کا ٹائر بھی نالے میں پھنس گیا ۔ اس طرح سڑک پر ٹریفک جام لگ گیا۔
کرین کی مدد سے دونوں کنٹینرس کو نالے نکال کر سڑک پر لایا گیا ۔ اس دوران اس کیچڑ بھرے نالے میں کئی دوسری گاڑیوں کے ٹائرس بھی پھنس گئے ۔ مقامی لوگوں کا کہنا ہے کہ پچھلے کچھ دنوں سے اس سڑک پر گاڑیوں کے پھنسنے کے واقعات ہوچکے ہیں مگر ٹھیکیدار کو اس کی کوئی پرواہ ہی نہیں ہے۔